Dawa ban ithuh iaki kur ki jait ha JHADC

Syllad | The Rising MeghalayaNovember 2, 2022

U Ma Khroo Lamsalanki Pariat u nongshong shnong ka Jowai ula ai da ka dorkhat sha ka executive committee jong ka Jaintia Hills Autonomous District Council ban kyntu iaka konsil ban shna iaki aiñ ban tehsong iaki kur ki jait katkum bala pynkup bor ka khyrnit ba hynriew (Sixth Schedule) jong ka riti synshar ka ri.

Ia kane ka dorkhat ula aiti ha u Chief Executive Member, JHADC u ma Thombor Shiwat haka jingiadonlang u EM JHADC Phasmon Dkhar haka sngi ba ar.

“Katba nang mih ki sngi ki jingroi ki bar jylla bad ki suba mynder ri la nang bun khamtam ha kine ki lum ki pdeng ki jong ngi ha kaba la don ki jingthoh ha ki khubor ba la lap ba don kiba pyndonkam bakla ne thoh ïa ki Kur ki jong ngi da kine kiwei pat ki Jaitbynriew. Kumta ban lait na ka jingpyndonbakla iaka kur ka jait ka jong ngi ki riewlum bad ban lait na ki jingeh hadien habud nga kyrpad jur ïa u phi (CEM) uba lah ih bha ha ka rta bad ka jinglong nongïalam, ban thaw aiñ thaw kyndon kloi kloi ïa ki Kur ki Jait katkum ba la pynkup bor ia ngi lyngba ka aiñ Sixth Schedule ka riti pyniaid ka ri India,” la ong ka dorkhat kaba ai u Pariat sha ka konsil

U CEM Ma Thombor Shiwat ula kular ban wanrah da ka rai ne ka resolution hapoh ka iingdorbar ka konsil halor kane ka aiñ ban ithuh iaki kur ki jait.