Dawa buh jaka talasi ka HYC ha Shella ba nangjur ka jingwan rungtuh na Bangladesh

Syllad | The Rising MeghalayaApril 24, 2025

Ka Hynniewtrep Youth Council (HYC) haka 24 tarik Iaiong ka la dawa ba dei ban buh noh da ki jaka talasi ne checkpoints/naka ha ki jaka kiba hap ha ka jingkhmih jong ka Shella Police Station, East Khasi Hills hadien ki jingkynnoh ba ka jingwan rung beain jong ki nong Bangladesh sha India ka la nangjur lyngba ki jaka khappud kiba laitlan.

U President ka HYC u Bah Roykupar Synrem ha ka shithi sha u SP ka East Khasi Hills u la ong, “Ka long kaba donkam ban buh noh mardor da ki jaka talasi ha ki jaka kiba hapoh ka jingkhmih jong ka Shella Police Station bad ha Sohra Civil Sub Division da kaba shim halor ka jingiajan jong ka thain bad ka Bangladesh.”

U la ong ruh ba ka jingbuh ia kine ki jaka talasi ka dei ban treikam pura baroh 24X7 bad ruh ban buh ha ki jaka kiba kham donkam bha hapoh ka Sub Division, kata katkum ka jingibit jong ka tnad pulit.

“Ngi kyntu ruh ba dei ban thaw da ki katto katne ki Standard Operating Procedure (SOP) na ka bynta ki bor pulit kiba ap ha kine ki jaka talasi khnang ban pynthikna ia ka jinglong peitngor bad husiar khnang ban khanglad ia ka jingwan rungtuh jong ki nong Bangladesh bad ban khanglad ia ki kam bymman da kaba jurip bniah ia ki briew, ki kali bad ban lum ia ki sakhi satar kynthup ia ki sakhi lyngba ki kor digital,” ong u Bah Synrem.

Une u nongialam ka HYC u la kynnoh ruh ba ka jingwan rungtuh jong ki nong Bangladesh sha India la ong ba ka la nangkiew naduh kine ki khyndiat bnai ba la dep khamtam ha ka por mynmiet lyngba kiba bun tylli ki jaka.

U la ong ruh, “Ngi la ioh jingtip ba ki kam khaii beain lyngba jaka khappud ki jur bha ha katei ka thain ha kaba kine ki nong Bangladesh ki lah ban pyndonkam ia ki lynti bad ki kali ban leh ia kine ki kam beain lyngba ka jingiarap jong ki katto katne ki dalal kiba dei ki trai shnong.”

“Katkum ki jingtip ba ngi la ioh kim don satia kino kino ki jaka talasi ha ki surok ba kongsan kiba pynaisoh ia ka Shella bad kiwei pat ki shnong khappud bad ka Sohra bad Shillong kiba hap hapoh u pud u sam jong ka Shella PS na ka bynta ban lapdien ia ki nong Bangladesh kiba wan rung beain bad ban tehlakam ia ki kam beain lyngba ki jaka khappud,” ong u Bah Synrem da kaba bynrap ba ha kiba bun ki khep dei ki riew paidbah bad ki dkhot jong ka seng jong ngi kiba la iarap lem ia ki pulit ban ioh kem ia kiba kum kine ki briew kiba don ha ka jingartatien bad ban aiti ia ki sha ki pulit.