Dawa buh ktem Pulit ka KSU ha Malidor ban khanglad khlong maw beaiñ bad kyntur pud ka Assam

Syllad | The Rising MeghalayaJanuary 14, 2021

Ka Khasi Students’ Union (KSU) Narpuh Circle haka sngi Palei kala dawa na ka bor synshar district jong ka East Jaintia Hills District ban buh da ka ktem pulit ba shipor ha Malidor ban khanglad iaka jingkyrtur pud ka Assam bad ka jingkhlong maw beaiñ ha wah Malidor.

Ka KSU hapoh ka jingialam u KS Suchiang president bad uS. Bamon general secretary kila leit ban ia kynduh bad u Deputy Commissioner East Jaiñtia Hills u Bah E. Kharmalki IAS, ban buh ka jingujor halor ka jingkyntur pud ka Assam bad ka jing khlong maw beaiñ na wah Malidor ba dang hap hapoh u pud u sam ka jylla  Meghalaya.

Ha kane ka jingia kynduh ka KSU kala dawa na u DC ban buh ia ka ktem pulit ba shipor ha jingkieng Malidor khnang ban peitngor ia ka jingkyntur pud bad ka jingkhlong maw ki nongkhaii maw Assam ha Wah Malidor.

Ka KSU halor kane kala dep ruh ban mudui da ka jingujor hapoh Umkiang Police Patrol Post bad la ai kopi ruh sha u Ranger Forest Officer Umkiang Range, Apha kumjuh sha u Divisional Forest Officer (Territorial) Jowai, West Jaiñtia Hills bad shaduh u myntri ka tnat Forest & Environment Dept jong ka sorkar jylla MDA.

“Ki suba nongkhaii maw na Assam kila pyrshang ban kyntur sha katei ka jaka bad la sakhi ruh ba ka Assam mynta lei ka la shna syndon da u surok haduh ha wah Malidor mar syndah bad ka jingjieng ha kaba la pynbitar puk ia ki nongshong shnong Ratachera bad mynhynnin 13/01/2021 ki paidbah Ratacherra ki la ia mih paibah ban khanglad ia katei ka jingpyntrei surok bad la pynpra pyntyllun da ki maw heh hapdeng surok,” la ong u KS Suchiang.

“U DC u la shimkhia da kaba phone mar mar sha u SP EJH ban dawa ban buh ktem pulit ba shipor hangtei ha jingkieng malidor haduh ban da poi ka aiom lyiur ban peitngor ia ka jingthmu ba sniew ka Assam. U DC u la kular ruh ban phone ia u DC Assam Cachar District ban phah pynsangeh shisyndon,” la ong u KS Suchiang bad ula bynrap ba ka KSU ruh kan ym shong kli kti, hynrei kan peitngor ban iada la u pud u sam ba ka khyndew ka shyiap kan ym leit sha ka Assam wat tang shi inshi ruh.