Dawa hiar shuki ka JAC ïa u Myntri Rangbah ka Jylla halor ka kam khaii dewiong beaiñ

Syllad | The Rising MeghalayaFebruary 11, 2020

JOWAI: Ka Meghalaya Joint Action Committee for Solution of Public Grievances (MJACSPG) kala dawa ban hiar shuki noh u Myntri Rangbah ka Jylla u Conrad K Sangma namar ba phiel kane ka sorkar MDA kaba ïalam ka NPP ban pynbeit ïaka kynrum kynram ka kam tih bad khaii dewiong haka Jylla.

Ïa kane ka rai la shim haka jingialang kaba long haka jingialang paidbah kaba long ha Hynniawmer, West Jaiñtia Hills District haka sngi ba Ar kaba la wan da ki nongkhaii bad nongshalan dewiong ka thain.

Kane ka JAC ka kynthup ïaka seng All Jaintia Hills Transporter Association (AJHTA) bad ka Meghalaya People’s Labour Union (MPLU).

Baroh ki nongkren ha kane ka jingialang kila kynthoh ïa ka sorkar MDA kaba ialam u Conrad K Sangma ka bym lah satia ban pynbeit ïa kane ka jingeh halor kam tih bad shalan dewiong.

U ma Erwin K Sutnga uba long Co- Convenor ka Meghalaya Joint Action Committee for Solution of Public Grievances bad u President Meghalaya People’s Labour Union ula ong “ U Conrad bad u James ki dei ban hiar shuki dalade namar ba kim lah ban khang ïaka jingkhaii dewiong beaiñ.”

“Tang kiba don jingiadei bad ki heh ki hain sorkar kila ioh ban khaii dewiong, katba kiwei pat ki rit ki ria lada ki pyrshang ban khaïi ki shah pyndik bad shah pynshitom haka bor jong ka aiñ kaba pynsohsat bad pyndom ia kiba bun ba lang,” la ong u Erwin bad ula dawa naka sorkar ba lada ka plie ban khaii ne tih dewiong kadei ban plie ia baroh salonsar khlem kano kano ka jingleh shilliang ban myntoi u paidbah.

“Mynta ruh ka don ka jingtohkit u Lokayukta ia ka jingshahkynnoh bamsap na ka kit dewiong, hynrei u Conrad u len ïa kaei kaba paw bad nga ngeit skhem ba baroh ki jingshisha kin sa paw,” ong u ma Erwin.

U ma Erwin ula kyntu ïaki nongkhaïi bad ki trai par ban leit sha ka jingpynsngewthuh paidbah ka DMR haka 17 tarik ha Khliehriat halor ka kam tih dewiong bad ki aiñ Mines and Minerals (Development and Regulation) Act 1957 bad ka Mineral Concession Rules, 1960 bad kiwei kiwei kiba ïadei bad ka mariang katkum ka hukum jong ka Supreme Court.

Hadien kane ka jingialang lada kim hun ïa kaei kaba mih na katei ka jingpynsngewthuh paidbah, ka JAC kan thied jingkhang jong ka Supreme Court pyrshah ïaka sorkar jylla kaba pynjynsur ïaka jingkhaii dewiong beaiñ ha ka jaka ban shna ïaki aiñ ban ïoh tih bad shalan dewiong.

Ha kajuh ka por u Erwin bad u ma Balen Thubru kila ong ba kin ai jingthoh sha ka sorkar ban pynmih da ka hukum ïaki kharkhana dewbilat ban pyntreikam ïaka dor ban kit dewbilat namar ba kine ki kharakhana kim shym la ai da ka dor kaba la buh ka sorkar.