Dawa hiar shuki ka VPP ia baroh ki MDC JHADC bym ioh tulop ki nongtrei

Syllad | The Rising MeghalayaSeptember 28, 2024

Ka Voice of the People Party (VPP) kala dawa hiar shuki ia baroh ki MDC jong ka Jaintia Hills Autonomous District Council (JHADC) hadien ba kim lah ban kit ban bah iaka lyngkor kaba la bynshet ha ki bad ban pynioh iaka tulop jong ki nongtrei.

Ia kane la ong da u Organising Secretary ka VPP u Bah Damewanhi Rymbai ha ka jingiakhih ba shisngi haka 27 tarik Nailur ban dawa pynioh tulop iaki nongtrei ka JHADC kaba la sah mynta la khyndai bnai.

U Bah Damewanhi haba kren shuwa ban pynkut iaka jingiakhih ula ong “Lada kim lah ban pyni ia kata ka bor kaba la pynkup haki, ka bha iaki 29 ngut ki MDC bad uwei u nominate MDC ka JHADC ban hiar shuki noh artad ba ka por jinglong MDC ka jong ki ruh kala kut.”

“Ngi kwah ba lashai lashisngi kin mih ki resignation letter na ki MDC halor ka jingbym lah ka jong ki ban treihok iaka kam kaba la bynshet ha ki,” la ong u bah Damewanhi bad bynrap “Ka jingkhang khyrdop ka JHADC ha kane ka jingiakhih jong ngi ka pyni ba ki iatreilang bad kyrshan iaka VPP ha ka ban pynbor iaka sorkar ban pyllait iaka tulop.”

Ka VPP kala ong ba kane ka jingiakhih ka long tang ka jingsdang bad lada ka sorkar kam sngap ka VPP kala byrthen ban pynbna da kiwei pat ki jingiakhih kiba tyngeh ban pynkohnguh iaka sorkar ban siew dep iaka tulop jong ki nongtrei.

Ha kane ka jingiakhih ka VPP la sakhi ia ki pulit kiba pahara iaka phyllaw ka konsil bad watla ki nongialam bad ki dkhot ka VPP kim shym la khang iaki nongtrei ka konsil ban rung bad mih, la lap ba bun ngut ki nongtrei ka konsil ki ia shong ha rud surok.

Kham hashuwa, u Damewanhi Rymbai ula iakren bad ka Secretary JHADC bad ban ailad iaki ban rung shapoh ka phyllaw ban pynlong iaka jingiakhih kaba jaijai da iathuh ruh iaka jingthmu jong ki ka long ban rah iaka sur ki nongtrei ka konsil ki bym ioh iaka hok jong ki.