Dawa iehnoh kam ka HNLC ia u MLA Sohra ba thmu khangdam syndon ia ka MCCL

Syllad | The Rising MeghalayaDecember 29, 2023

Ka Seng Hynniewtrep National Liberation Council (HNLC) haka 29 tarik Nohprah ka la pyrshah jur ia ka jingthmu jong ka sorkar jylla ban khangdam noh syndon ia ka Mawmluh Cherra Cements Ltd (MCCL) bad dawa ruh ia u nongmihkhmat ka NPP napoh Sohra u Bah Gavin M Mylliemngap ba un shim ia ka jingkitkhlieh da kaba hiar shuki noh kum u MLA.

Ka Seng ka maham ruh da kaba ong, “Lada une u MLA u kyntait ban iehnoh kam un hap ban shim ia ka jingkitkhlieh kumba ma u bad ka sorkar jong u ki pyrshang ban tep im ia ka MCCL.Ngin tei pop halor jong phi lyngba ki jingleh jong phi.Ki nongshet kylla jong u paidbah ki dei ban ngat ha ka jingshah pynshitom da ka jingiap.”

Ka Seng ha u kyrwoh ba la phah da u Bah Saiñkupar Nongtraw, General Secretary cum Publicity Secretary ka la ong ba kane ka jingbyrngem jong ka sorkar jylla ban khangdam syndon ia ka MCCL ka dei ka jingleh kam sain hima.

U la ong ba ka HNLC ka pynrem jur ia kane ka jingthmu ba sniew jong ka sorkar ban pynkylla khlem kam khlem jam ia ki nongshong shnong ka thain Sohra bad ban pyrshang ban pynrung ia ki halor ki mat kiba thmu na ka bynta ki jingioh nong shimet.

“Ha ka jaka ban phaikhmat ban kyntiew bad pynbha ia kane ka kompeni MCCL Ltd, pynbna ka jingthmu jong ka sorkar ka long pynban ban khangdam noh syndon bad ban kyntiew ia ki karkhana pynmih dewbilat jong ki kompeni ba la longtrai da ki briew ki bym dei ki trai shnong na kiwei pat ki jylla. Kane ka jingleh ka la ktah jur ia ka jingsngew jong kiba bun ki trai shnong riewlum,” ong utei u nongialam ka Seng.

Nalor kata u la ong, “Kane ka wanrah ruh ka jingartatien kaba jur halor ka jinglah jong ka sorkar ban pyniaid ia ka jylla lada kim lah ban tehlakam halor kane ka jingeh kaba la slem jong kasne ka karkhana MCCL. Kane ka paw shai ba ka Meghalaya ka la don lypa ha ka kyrdan kaba ar hapoh ka ri India kum ka jylla kaba duk tam. Shen kan sa mih ka jingialeh kaba jur halor ki kam jaka puta bad ha ka liang ka ioh kam ioh jam ha ka jylla hapdeng ki trai shnong bad ki briew kiba dei na shabar jylla. Kane u la ong kan wanrah ka jingbitar haspdeng ki khun samla kiba don ha ka kutlad bad ki ban sa ieng ialeh pyrshah ia ka sorkar da kino kino ki lad ki lynti.”

“Ia mynta hi ngim shym la iohi ia kino kino kiwei pat ki lad ki lynti.Kumta ruh ka Seng HNLC ka buh ka jingtyrwa ia ki nongtrei jong kane ka karkhana ba lada ki kwah ban iakhun ha ka jingialeh, ngin pynioh ia ki ia ka jingsiew kaba T.25,000 man la u bnai. Kiba lah ban aplai kin long kiba hapoh ka rta 45 snem bad ki ban hap ban leit shah hikai ha ki kam iakhun pyrshah,” ong shuh shuh u Bah Nongtraw.