Dawa jingpynshai ka ECI na ka VPP halor ka jingjia shah pynthut ka jingialang ka NPP
Ka Tnat pyniaid ilekshon ka Jylla ha ka 10 tarik mynta u bnai ka la ai da ka show cause notice ban pan jingpynshai na ka party liang pyrshah Voice of the People Party (VPP) ha kaba iadei bad ka jingkynnoh leit pynthut ki nongkyrshan ki jong kane ka party ia ka jingialang ialap ilekshon jong ka seng National People Party (NPP).
Ha kane ka notice ba la phah sha u president ka VPP u Bah Ardent M Basaiawmoit, u Returning Officer (RO) ka Shillong Parliamentary constituency u la pan ka jingpynshai ha kaba iadei bad katei ka jingkynnoh ha lane shwa jong ka 12 tarik mynta u bnai.
![](https://www.syllad.com/wp-content/uploads/2024/09/JIT-Vacancy-823x1024.avif)
U RO u pyntip ba ki la ioh pdiang ia ka jingujor ha ka janmiet jong ka 9 tarik mynta u bnai bad ha ka 8 tarik Iaiong ha ka por ba la pynlong ia ka jingialang ialap ilekshon da ka seng NPP ha Jaiaw, East Khasi Hills, ki nongkyrshan ka VPP ki la sdang ban pynthut ia kane ka jingialang.La ong ba ki nongkyrshan ka VPP ki la pynmih ia ki sur jingpyrta kaba la pynthut ia ka jingialang bad ha kaba la hap ban shu pynwai noh khlem pat dei ka por.
Hadien ba la pyntreikam ia ka Model Code of Conduct naduh ka 16 tarik u Lber ba la dep ka la kdew shai katkum ki kyndon ba ki party sain pyrthei bad ki kyrtong ki dei ban pynthikna ba ki nongkyrshan jong ki kim dei ban pynmih ia kino kino ki kynrum kynram ne ban pynthut ia ki jingialang ne ki rally ba la khot pynlong da kiwei pat ki party sain hima.
Nalor kata ki nongtrei ne ki nongiarap jong kiwei ki party sain pyrthei kim dei ban pynthut ha ki jingialang paidbah jong kiwei pat ki party da kaba buh jingkylli ne sam ia ki kot lyngkdop na ka bynta ki party jong ki. Nalor kata la khang pyrshah ruh ban pynlong ia ka jingiaid procession da kawei ka seng sain pyrthei ha ki jaka ba long jingialang jong kiwei pat ki seng. Ym dei ban weng ia ki poster bala tah da kiwei ki seng sain pyrthei da ki nongtrei jong kawei pat ka seng.
Kumta u RO ula ong “Kumta, haba ailad ia phi ban ioh ia ka jingbishar, la bthah ia phi ban jubab ia ka show cause ha lane hashuwa ka 12 tarik Iaiong ba balei ba ym dei ban leh eiei pyrshah ia phi (Ardent M Basaiawmoit) hapoh ki kyndon jong ka Model Code of Conduct”.
Ha kawei pat ka notice u RO u la ong ba ki la ioh pdiang ia ka jingujor pyrshah ia ka VPP halor ka jingpyndonkam ia ki rynsan social media na ka bynta ban shna ia ki khubor bym shisha pyrshah ia ka kyrtong jong ka seng NPP lyngba ka youtube video (ba la pyllait ha ka 03.04.2024). Ha kaba iadei bad kane la pan ka jingpynshai na u president ka VPP ha lane shwa ka 11 tarik mynta u bnai.
Leave a Reply