Dawa jingtohkit ba laitluid ka HYC halor ka jingsuba lait lyer bih uranium

Syllad | The Rising MeghalayaOctober 13, 2020

Ka HYC South West Khasi Hills ha ryngkat ka HYC Umdohlun Circle kala leit ban ai dorkhat haka Deputy Commissioner, South West Khasi ban dawa thung jingtohkit ba laitluid halor ka jingsuba lait ka lyer bih uranium ha ka Nongbah Jynrin, Mawthabah.

Kine ki artylli ki tnad treikam ka HYC kila dawa naka Deputy Commissioner, South West Khasi Hill ban thung iaka jingtohkit ba laitluid ‘Independent Expert Inquiry Investigation Agency, ban pynthikna ia ka jingktah ka jaka pyllang lyer bih uranium ha Nongbah Jynrin, Mawthabah ban lait ktah iaki nongshong shnong bad ki shnong ba marjan.

“Ngi dawa ruh ba dei ban pyndam noh mardor bad kset sbak ia kitei ki jaka pynlang jakhlia uranium bad ban pynthikna ba kitei ki jaka kin nym pei (leak) shuh,” ong ka HYC bad bynrap ba HYC kala dep pynthikna b aka don ka jingorpait ba mih ka lyer bih na katei ka jaka pyllang lyer uranium.

“Ka Deputy Commissioner ka dei ban tuklar bad shimkhia mar mar ban kset ia kitei ki jaka sbak ban shong shngain u paid ka dong ka thaiñ bad ia ka distrik hi baroh kawei,” la ong u Moonkingstar L Paliar, General Secretary HYC SWKH.

Ha kane ka jingiakynduh ia ka DC South West Khasi Hill nalor u Moonkingstar la iadonlang u Arbok Kharjahrin, President ka HYC SWKH, ha ryngkat ki nongialam ba hakhmat ka HYC Bantei Wanniang, Vice President HYC SWKH, Rishotroy Kharjahrin, Organising Secretary HYC SWKH bad kiwei kiwei ki dkhot.