Dawa ka Academic Council na u VC ka NEHU ban khot pynlong ia ka jingialang ba kyrkieh halor ka jingpyntreikam NEP

Syllad | The Rising MeghalayaOctober 5, 2023

Ki dkhot jong ka Academic Council (AC) ka North Eastern Hill University (NEHU) ka la dawa ia u Vice Chancellor bad Chairman ka Academic Council u Prof P Shukla ba u dei ban khot pynlong ia ka jingialang kaba kyrpang bad kyrkieh khnang ban iatai halor ka jingkynnoh pyntreikam khlem iahap ia ka National Education Policy (NEP) 2020 ha ka kyrdan Under Graduate na ka bynta ka samoi 2023-24 khlem ka jingmynjur da ka Academic Council.

Na ka liang u President ka Teachers Association (NEHUTA) Prof Lakhom Kma ha u kyrwoh ba la pyllait haka sngi Balang u la ong ba kane ka jingshim rai ka la wan long ruh hadien ba u Vice Chancellor ula pynpaw ka jingbym kwah ban khot ia ka jingialang ba kyrkieh jong ka Academic Council wat hapdeng ki jingkyrpad ba bun da ki nonghikai lyngba ki synjuk jong ki lem bad kiwei kiwei ki kynhun.

Nalor kata u la ong ruh ba ki dkhot kiba ba don jingkitkhlieh jong ka AC ki sngewkhia jur halor ki kam pyni bor bad mushlia ha kaba ba iadei bad ka bor jong ka AC bad ka jingpynhein ia ki kyndon bad rukom treikam katkum ka NEHU Act, Statutes bad Ordinance.

Kumta u la ong ba na ka liang ki dkhot kila kyntu na ka bynta ban khot pynlong ia ka jingialang kaba kyrkieh bad kyrpang  jong ka Academic Council ban iakren halor ka jingpyntreikam ba khlem iahap ia ka NEP 2020 ha ka kyrdan UG ha ki college bala pyniasoh bad ka NEHU khlem da ioh ia ka jingmynjur jong ka Academic Council kat kum ka Regulation RA-5, Clause 13, under Clause (1) (a) bad (2) of Statute 42.

Shuh shuh u Prof Kma ula ong ruh ba na ka liang ki dkhot ka Academic Council kim kwah satia ban iakren halor ka jingpynsangeh noh ia ka jingtreikam ia ka NEP hynrei halor ka jingdonkam kyrkieh ban pynbeit ia ki rukom pyniaid ba bakla.

Ki la don haduh palat 100 ngut ki dkhot ka Academic Council na Shillong bad Tura Campus ka NEHU kiba la iasoi ia ka jingdawa ban khot ia ka jingialang kaba kyrkieh bad kyrpang jong ka AC, kaba long palat ia ka jingdonkam paid ba shipawa na ka laipawa ka jingdon ki dkhot ka AC katkum ka Regulation RA-5, Clause 13, under Clause (1) (a) bad (2) of Statute 42, ong shuh shuh utei u president ka NEHUTA.