Dawa ka BJP ia ki sienjam ba kyrkieh ban tehlakam ia ka jingkynrei jong u drok

Syllad | The Rising MeghalayaJune 28, 2024

Shibynta ka jingrakhe ia ka sngi pyrshah drok ha ka pyrthei, u nongaiktien ba halor ka BJP ka Jylla u Bah M Kharkrang ha ka 27 tarik mynta u bnai u la ong ba ka party ha ka Jylla kumba long kiwei pat ki nongshong shnong ka Jylla kiba don ia ka jingkitkhlieh ka sngewkhia jur halor ka jingkiew jong ki kam khaii drok ha ka Jylla, khamtam ha ka nongbah Shillong.               

U la ong ba na ka liang ka party ka kyntu jur ia ka Sorkar kynthup ia ka Tnat pulit ba kan pyndonkam ia baroh ki lad ki lynti ban leh ban tehlakam ia ka jingkynrei jong u drok uba la ktah jur ia kiba bun ki khun samla bad ia ki longiing longsem bad ia ka imlang ka sahlang hi baroh kawei.         

U Bah Kharkrang u la ong ruh ba katba ka party BJP ha ka Jylla ka ai ka jingiaroh ia ka jingsien ba dang shen jong ka Sorkar lyngba ka Tnat Social Welfare ban pyniadon bynta ia baroh ki kynhun lyngba jong ka DREAM Project, hynrei dang donkam shuh shuh ia ki sienjam, bad na ka liang ka party ka iai ban ba kum kine ki jingpyrshang ki dei ban urlong lyngba ka jingpyniaid ia ki kam.     

Nalor kata u la ong ba ka BJP Meghalaya ka pyrto ia ki jingioh kurup drok ba dang shen jong ki bor pulit na ki thain Polo, kumjuh na ki jaka rung kiba kongsan sha ka Jylla kiba lam ruh sha ka jingshah kem jong ka snar khaii drok kaba kyrteng ka Maya Gowda na Khliehriah, East Jaintia Hills.         

Kumjuh u la ong ba ka party ka kyrshan ruh ia a Tnat pulit halor ka jingpyntreikam ia ka ain “Prevention of Illicit Traffic in Narcotics Drugs and Psychotropic Substances Act,” ka ban plielad ban set kum ka lad jingiada kaba long naduh shi snem haduh ar snem na ka bynta kito ki nongkhaii drok kiba la leh bun bunsien ia kane ka kam bymman.  

“Kane kan ailad ia ki kynhun tohkit ba kin pyndep ia ki jingtohkit hapoh ka por ba la buh, kaba mut kat haduh shwa kaba kut jong ka por ba kin shah set, bad ka jingtian bishar la khmih lynti ba kan kut noh ba ba ki nongleh kam bymman kin shah rai pynrem,” u la ong da kaba bynrap ba kane ka sienjam kan pynthikna ba kito ki nongkhaii drok ba shyrkhei kin shah set kham slem, bad kane kan ym pynshlur ia kiwei pat ba kin leh ia kiba kum kine ki kam bymman.