Dawa ka BJP Meghalaya ban pynshitom mardor ia ki runar ba donkti ha ka kam pyniap ha Mawroh

Syllad | The Rising MeghalayaApril 11, 2024

Ka Seng Bharatiya Janata Party (BJP) Meghalaya ka la pynrem jur ha kaba iadei bad ka jingjia shah pyniap jong uwei u nongbylla bar jylla bad ka jingshah pynmynsaw jong ki arngut kiwei ha ka jingjia shah thombor kaba la jia ha ka step jong ka 10 tarik mynta u bnai ha ka thain Mawlai Mawroh bad dawa ban kem mardor ia ki runar kiba donkti.

Na ka liang u President ka BJP ka Jylla u Rikman G Momin u la ong, “Dei ban pynrem jur ia kane ka kam khawpud jong ki runar da baroh ki kynhun ha ka imlang ka sahlang. Kiba kum kine ki kam pyntriem ki pynjah burom ia ka Jylla kaba don hapdeng ka suk ka sain bad kaba wanrah ka jingshong syier ia baroh ki nongshong shnong ka jylla Meghalaya hi baroh kawei, kata la ki dei na kino kino ki kynhun jaidbynriew.”

U la ong ruh ba ki kam pyntriem ki la sdang ban khie rasong ha ka Jylla naduh kine ki khyndiat por ba la dep, bad  ki khubor kiba pynkyndit ki la mih na ki bynta bapher bapher ka Jylla kaba la pynlong ruh ia ki nongshong shnong ka Jylla kiba ieit ia ka jingsuk ba kin ym lah shuh ban shah.

“Nga kyntu jur ia ka sorkar Jylla ba kan shim mardor ia ki sienjam bad kem mardor bad ban pynshitom ia kine ki runar kiba donkti ha kane ka kam pyntriem,” u la bynrap.

Une u president ka BJP u la pynsangeh ruh ha kaba iadei bad ka jingthmu ban leit jurip shapoh Garo Hills bad wanphai pat sha Shillong khnang ba da lade hi un ioh ia ka lad ban pynpaw ka jingsngewlem sha kiba haiing hasem jong une u lanot bad ban pynpaw ka jingiadon ryngkat lang bad kito kiba la ngat ha ka jingmynsaw ha katei ka jingjia.