Dawa ka bor shnong Khanduli na ka bor synshar District West Jaintia Hills ban khlong biang iaka met kaba la tep hapoh u pud u ang ka shnong

Syllad | The Rising MeghalayaOctober 6, 2022

Ka bor shnong Khanduli kala pynpaw ka jingpyrshah kaba jur halor ka jngtep briew klumar ka bor synshar district bad ka tnad Pulit jong ka West Jaintia Hills District hapoh u pud u ang ka shnong ka khlem ka jingtip ka bor shnong haka 24 tarik u bnai Nailur 2022.

U Waheh Shnong ka Shnong Khanduli, u Ma Yooshida Nongspung, ula ong ba ka bor shnong Khanduli mar mar kala lum jingialang haka 26 tarik bad buh iaka jingujor sha ka bor synshar district jong ka West Jaintia ban dawa khlong biang ia kane ka met hapoh 24 kynta, pynban haduh bala ai iaka khubor ym pat don kino kino ki dak ki shin ban khlong ia katei ka met.

Ka bor shnong lyngba u waheh shnong Ma Yooshida Nongspung kala kyrpad iaka bor synshar district ban khlong biang iaka met kaba kila tep hap shnong Khanduli namar ba ka bor shnong da kawei ka sur ka pyrshah ia ka jingwan tep briew klumar hapoh shnong poh thaw bad ban pynhun ia ki kum ki nongshong shnong uba la pyrshah jur ia kane ka kam.

Haba kylli, ula ong kim tip ka met iap jong no la tep, hynrei ki dawa mardor naka bor synshar district ban khlong biang iaka metiap.

Ha kane ka jingiakren bad ki nongthoh khubor la iadonlang u Chairman shnong barim ka Khanduli  Ma Wanbiang Slong, Secretary Chnong Khanduli, Helpme Slong nalor kiwei kiwei.