Dawa ka committee ban plie noh iaka BEd College ha Jowai

Syllad | The Rising MeghalayaAugust 1, 2022

Ka Joint Action Committee (JAC) kaba kynthup iaka Jaintia Students’ Union (JSU) bad ka Synjuk Waheh Chnong Jowai da kawei ka sur kila dawa na ka sorkar ban plie noh iaka BEd College ha Jowai.

Ia kane ka JAC kala ong hadien ka jingialang kaba long haka sngi Nyngkong ha Infinity Hall Mooralong Ladthadlaboh, Jowai kaba iadonlang ki nongialam ka synjuk waheh chnong Jowai, president Alan Niangti, secretary Riquoma RQ Laloo nalor u secretary JSU Treiborlang R Suchen bad kiwei kiwei.

Ka JAC kan pan jingshai na ka sorkar jylla halor ka jingpynslem ban plie noh iaka B.Ed College ha Jowai kaba iaka building ban pynlong iaki klas ruh ka sorkar kala dep shna ha Mynthong Jowai, kaba pynlong skul noh ka Kiang Nangbah Govt. Higher Secondary School.

U Treibor R Suchen u la ong ka JSU ka la dep ban dawa iaka B.Ed College ha Jaintia naduh u snem 1987 haka por ba long President u Ma Garland Rymbai bad u R Swer kum u General Secretary bad u lah ong  ba ka sorkar jylla ka dei ban pynkloi ban pan noh iaka jingithuh iaka B.Ed college ha Jowai na ka NCTE na Delhi ban sdang noh iaka B.Ed. “35 tylli ki snem kila leit, hynrei haduh mynta ym pat iohi satia ia kino kino ki dak ki shin ba ka rilum Jaintia kan iohi iaka BEd College, katba ka Tura dangshen la plie iaka B.Ed College bad kane lah pynbna hi da u Myntri Rangbah ka Jylla u Conrad Sangma,” la ong u Suchen.

Na ka liang ki nongialam jong ka Synuk ki Waheh Chnong Jowai ki la ong ba ka sorkar ka dei ban plie noh ia kane ka shlem pule ban ioh jingmyntoi ki khynnah pule ka thain khamtam ba dang duna ki jaka pule B.Ed hapoh ka jylla bad shen ka JAC kan ai da ka jingthoh sha ka sorkar.