Dawa ka CoMSO ban pynsangeh thungkam ia ka samla ba pass MCS ba artatien ban dei ka Garo

Syllad | The Rising MeghalayaApril 22, 2025

Ka Confederation of Meghalaya Social Organisations (COMSO) ha ka 21 tarik Iaiong ka la dawa ban pynsangeh shwa mardor ia ka jingthungkam ia ka Esther Ngurlienmoi Marak kaba la shah jied na ka bhah Scheduled Tribe jong ki Garo ha ka eksam Meghalaya Civil Services (MCS), tad haduh ban da dep pynshisha ba ka dei ka jaidbynriew Garo.

Ha u kyrwoh ka COMSO ka la dawa ruh ban thung da ka State-level Independent Enquiry Committee kaba kynthup ia ki khlieh nongsynshar, kata ki Nokma bad ki nongialam jong ki Mahari, ki nongmihkhmat na ka Autonomous District Councils (ADC), ki riew shemphang halor ki riti dustur jong ki riewlum bad ka Tnad Tribal Affairs ka Jylla ban shong bishar ia kane bad ia kiwei kiwei ki case kiba don ka jingiasyriem bad kane.

Ka COMSO ka la kynnoh ba ka Esther Marak ka la shah jied wat hapdeng ka jingbym lah ban pynthikna ia ka jinghiar pateng jong ka na ka kmie Garo ba la ithuh da ka Mahari ne ka Kur lane ka jingpynshisha halor ka jingwan na ka tynrai jong ki jaidbynriew Garo.

Nalor kata ka la kam ruh ba katkum ka jubab RTI na ka ophis ka Deputy Commissioner, East Khasi Hills District (vide Letter No. P.15/1/26/09/Vol-I/82, dated 20th March 2025), la pynthikna ba ym shym la don kino kino ki rekod kiba iadei bad ka jingai Scheduled Tribe Certificate sha ka Ester Ngurlienmoi Marak.

“Kane ka jingbym don ia ki kot ki sla kiba biang ka la pynmih ia ka jingkylli halor ka rukom pyniaid kam kaba khuid ba suba, ka bynta jong ka jingbishar ia ki kot ki sla da ki bor ba dei khmih lane ka jingleh bym hok ha kaba iadei bad ka jingpynioh certificate bad thungkam. Ka COMSO ka shim ruh ia kane ym tang ka jingpynkhein ia ka jingshaniah hynrei ka jingpynkhein ia ka jingngeit ba la ai da ki paidbah sha ki Tnad treikam ka sorkar Jylla Meghalaya. Lada ka jingithuh ia ki trai shnong riewlum ki bym shisha ym lah ban tehlakam kumta ruh ka lawei jong ka Reservation Policy, ka jingshaniah jong u paidbah bad ka jingsynshar khadar tynrai ka don ha ka jingma kaba khraw,” ka la bynrap.

Nalor kata ka Confederation ka la dawa ruh ia ka jingpynthikna halor ka syrnot riewlum kaba pynmih ia u dak jingkylli, kynthup ka jingpynshai paidbah ba kumno la ai ia ka syrnot, mano ba la aibor bad balei jah ki rekod kiba iadei bad ki kot ki sla.

“Ngi dawa ruh ban pynbahkhlieh bad ban shim ia ki lad jingpynshitom pyrshah ia kino kino ki ophisar kiba donkti ha ka kam ai certificate beain, kata la ka long da ka jingleh torti lane ka jingthmu khnang,” ong ka COMSO.

“Ka dei ban don ka jingbishar bad ka jingleh audit kaba pura ia ki tribal certificate ha baroh ka jylla ia kiba la dep ai naduh kine ki phew snem ba ladep ia ki nongtrei sorkar, ki kam pynrung klas ha ki jaka pule bad kiwei kiwei ki jingmyntoi ba la ioh lyngba ka bhah ST, da kaba phaikhmat kyrpang halor ki jingpynshisha ryngkat bad ki bor ba dei khmih na ki kur bad ki bor synshar shnong,” ka la ong.

Shuh shuh ka COMSO ka maham ruh da kaba ong, “Lada ka sorkar Meghalaya kam leh ei ei ia kane hapoh ki khyndiat por, ka Confederation ka don ia ka hok ban shim da kiwei pat ki lynti, kaba kynthup ia ka jingmudui lyngba ka ain bad ki jingiakhih ba jai jai khnang ban iada ia ki hok jong ki trai muluk bad na ka bynta ka burom jong ka jaidbynriew.”