Dawa ka COMSO da ka jingtohkit halor ka jingkynnoh bamsap na ka skhim MGNREGA 

Syllad | The Rising MeghalayaApril 29, 2025

Ka Confederation of Meghalaya Social Organisations (COMSO) ha ka 28 tarik Iaiong ka la dawa ban thung mardor da ka jingtohkit magisterial ne judicial halor ka jingkynnoh pyndonkam bakla ia ka pisa jong ka skhim Mahatma Gandhi National Rural Employment Guarantee Act (MGNREGA) hapoh Demdema C&RD Block lyngba ki job card kiba shu thok bad kumjuh da kaba phah ia ka pisa sha kiwei pat ki account.

Ha ka shithi sha u Deputy Commissioner ka West Garo Hills district, ka COMSO ka la ong, “Ngi dawa ban pynlong ia ka jingtohkit Magisterial ne Judicial khnang ba kan long kaba laitluid bad bym shah liang halor ka jingkynnoh pyndonkam bakla ia ka pisa job card ba shu thok bad ka jingpyndonkam bakla ia ka pisa bai nong.

Ka COMSO ka la dawa ruh ban pynsangeh kam ne sospon mardor ia ki ophisar, kynthup ia u DEO katba ka jingtohkit ka dang iaid khnang ban lait na ka jingpynkylla ia ki digital record bad ban pynthikna ia ka jingtohkit kaba khuid ba suba nalor ban pynlong ia ka jingleh audit ia baroh ki job card ba la ai bad ia ka bai nong ba la siew hapoh jong ka Demdema C&RD Block naduh kine ki san snem ba la dep.

“Ngi dawa ruh ban pyngngat ha ka ain ia baroh ki briew kiba donkti halor kane ka jingleh thok ha ka liang ka pisa tyngka, ka kam bymman bad ka jingpynkhein ia ka jingshaniah,” ka la ong da kaba banjur halor ka jingdonkam ban pynkylla ia ki tnad treikam bad ki lad jingiada, kaba kynthup ia ki rukom pynshisha kiba khlain lyngba u Aadhaar, ki jingpeit bniah ba man ka por bad ki lad jingiada kiba khlain khnanglad ia kiba kum kine ki jingjia hadien habud.

Ka COMSO ka la pynshong nongrim ruh halor ki jingioh jingtip ba la pynshisha bad ki kaiphod na ki nongshong shnong kiba la kynnoh ba ki la don bun bah ki job card kiba beain bad ba shu leh thok hapoh katei ka block hapdeng jong ki snem 2020-2021 haduh 2024-2025.

Kane ka jingleh kam shukor ha ryngkat ka jingphah ia ka pisa bai nong jong ki briew sha ki account jong ki bym dei hok lane ki briew ki bym shym la don satia ka long kum ka jingthombor ia ka jingthmu jong ka MGNREGA Act kaba thmu ban kyntiew ia ka roi ka par hapdeng ki nongshong shnong kiba duk ha ki thain nongkyndong.

Nalor kata ka COMSO ka la ong ruh ba katkum ka jingjurip bniah la lap ba ka jingdon jong ki job card ba la ai hapoh jong ka Demdema C&RD Block ka la kiew sted shibun ha ka rukom kaba pynsuba, kata tang ha ki katto katne ki Village Employment Councils (VEC) kata kum ha ka shnong Bhangarpar bad Bangalkhata (Muslim), ha kaba ka jingdon jong ki job card ka la palat wat ia ka jingdon jong ki nongthep vote, ong ka COMSO da kaba bynrap, “Ka jingtohkit ka kdew ruh halor ki jingleh kam thok ba la lamkhmat da ki katto katne ki ophisar, kata kum u Data Entry Operator, u Dildar Attaullah Reza.

Shuh shuh la kynnoh ruh ba ki la don ki khep ha kaba ki khynnah rit ki don ha ka thup kum ki nongioh bynta ha ki job card bad ka jingsiew bainong sha ki briew ki bym dei hok.