Dawa ka Dorbar Thangskai bad JSU na ka Sorkar ban weng ia u Ayush na ka bhah pule MBBS na ka jylla

Syllad | The Rising MeghalayaSeptember 12, 2023

Ki nongmihkhmat na ka dorbar shnong Thangskai bad ka Jaintia Students’ Union (JSU) haka sngi Nyngkong ki la kyrpad iaka Myntri ka Tnad ka koit ka khiah ka Kong Ampareen Lyngdoh ban tuklar lem na ka bynta ban weng ia uwei u briew uba la tip kyrteng kum u Ayush Kumar na ka thup jong ki samla kiba la shah jied ban leit pule MBBS na ka bhah ka jylla namar um dei satia u nongshong shnong ba pura jong kane ka shnong.

“Ngi dawa ban weng noh ia ka kyrteng ka jong u na ka list jong ki samla kiba la shah jied ban leit pule MBBS na ka bhah ka jylla namar um dei satia u nongshong shnong ba pura jong ka shnong Thangskai, East Jaintia Hills District,” ong ka dorbar shnong Thangskai ha ka shithi ba la ai sha katei ka Myntri.

Na ka liang ka dorbar shnong Thangskai ka pynrem jur ruh ia ka kam leh thok jong u Ayush bad ka khmih lynti ruh ba na ka liang ka sorkar kan shim mardor ia ki lad jingpynshitom ha kaba iadei bad kane ka bynta.

La ong ba ha u snem 2021, u Waheh Shnong jong ka shnong Thangskai u la iakynduh ia u Sunil Kumar uba dei u kpa jong u Ayush na ka bynta ban pynioh ia ka residential certificate kaba shipor na ka bynta u khun jong u, kata tang ban pyni ia ka por kaba u sah sha ki bor pyniaid college ha Odisha, kata ha ka por ba u khun jong u, u dang pule ha ka 10+2.

Kumta ruh ia ka certificate la ai beit thik tang ban pyni ia ka jaka shong ba mynta jong u kumba la kyrpad da u kpa jong u Ayush tang katei ka kam, kata ruh halor ka nongrim ba u la shong la sah bad u trei u ktah hapoh ka shnong Thangskai mynta lah kumba 12 snem ei ei kaba la pynlong ruh ia u Waheh Shnong ba un ai ia kane ka certificate.

Hynrei ha ka por ba la aiti ia kane ka certificate ba shipor, kam shym la kdew pat ba yn ym lah ban pyndonkam ia ka na ka bynta ban aplai ia ka Permanent Residential Certificate (PRC) lane ia kino kino ki kot ki sla na ka sorkar lane ia ki bhah na ka sorkar Meghalaya, ong katei ka kynhun.

Shuh shuh na ka liang ka JSU ba ka ong ba na ka liang ka kynhun ka la shim ia ka rai ban dawa jingpynshai shuh shuh na u deputy commissioner ka district ha kaba iadei bad ka jingshim rai ban pynioh ia ka PRC na ka bynta u Ayush Kumar.

“Na ka liang ka Myntri ka la pynti ha ngi ba ka sorkar ka la pdiang ia ki kot ki sla ia kaba la phah da ka ophis u DC bad shem ba u Ayush Kumar u la phah da ka PRC ba la ai da ka ophis u DC ha u snem 2021. Nalor kata ka la ban ba ka kynhun ka dei ban pan shuh shuh ka jingpynshai ia u DC ha kaba iadei bad ka PRC ba la ai sha u Ayush,” ong ka kynhun.

Ha kawei pat ka bynta na ka liang ka JSU ka la kyntu ia ki bor pyniaid shnong ba kin kiar na kaba ai NOC bad ia ki residential certificate khlem kano kano ka jingtohkit kaba bniah.