Dawa ka DS Namdong ban weng mardor ia ki briew ba rep synsar beain ha khlaw Thadmynri ba la ai sha ka JHADC

Syllad | The Rising MeghalayaDecember 8, 2024

Ka Dorbar Shnong Namdong lyngba ki nongialam shnong ha ka 6 tarik Nohprah ka la leit ban ai da ka dorkhas ba khatduh sha u Chief Forest Officer JHADC Jowai bad sha u Dy. CEM JHADC Jowai halor ka jingbym lah jong ka ophis ban pynduh pyndam ia ka jingrep synsar beain jong ki briew na Thadmynri hapoh ka khlaw (forest) plantation kaba ka dorbar shnong Namdong ka la ai sha ka JHADC Jowai naduh ka 5 tarik Naitung 1980.

Katkum ka dorkhas la ong ba ha ka por ba ai ia kane ka khlaw ka la don lypa shibun ki dieng sal kiba heh, hynrei katba nang mih ki sngi ki snem la sdang ban pom pathar ia kine ki dieng sal bad hadien ba la jan lut kine ki dieng mynta pat da ki spah ngut ki nongshong shnong ka Thadmynri ki la hiar ban rep synsar ha kane ka plantation.

Kumta halor kane ka shnong Namdong ka la ujor bunsien sha u CEM bad sha u Chief Forest Officer ban dawa ban pynkut noh ia kane ka jingrep synsar beain jong kine ki briew ha kane ka jaka, hynrei kane kam shym la treikam satia wat lada ngi ujor katno katno ruh, ong ki nongialam shnong.

Kumta ha ka 5 tarik Nohprah 2024 ka Dorbar Shnong lyngba ka Dorbar paidbah ka la shim ia ka rai ba khatduh ban ujor ia kine ki briew sha ophis ban pynkut noh syndon ia kane ka jingrep beain ha kane ka jaka ha shwa ka 16 tarik Nohprah 2024, bad ban thung biang da ki dieng bad lada ka ophis kam lah ban leh kumba la ia kut ha ka agreement kan bha ba kan aiti biang ia kane ka jaka sha ka shnong Namdong ban peit bad sumar.La ong ruh ba lada ka ophis kam lah ban leh eiei ha lane shwa kane ka sngi 16 tarik ka Dorbar Shnong kan leh eiei da kaba tyngeh halor kane ka khlaw.

Ka Dorbar lyngba u kyrwoh ka pynpaw ruh ba kine ki briew na kane ka shnong Thadmynri ki la wan ban shong shnong sha kane ka jaka lynga ka jingaibor ka shnong Namdong Elaka Nongjngi ha kaba la ai lang ia ki ki jaka rep ki khlaw bam dieng bad ki jaka shna iing, hynrei katba nangmh ki sngi kine ki briew na kane ka shnong Thadmynri ki la sdang ban pynjot ia kane ka khlaw da kaba rep synsar, bad kaba pynlyngngoh shuh shuh ia ngi kum ka shnong Namdong ka Raij Namdong bad ka Elaka Nongjgni mynta ba kine ki briew ki la kwah pat ban leit sha ka Elaka Nartiang kaba la pynlong ia ngi ban ieng pyrshah ia kane ka jngleh buit tuh jong kine ki briew tang ban pynjot ia ka imlang sahlang.