Dawa ka FKJGP ban pynbiang iaka jingshakri ka JIO ha Lama Bataw

Syllad | The Rising MeghalayaApril 30, 2021

Ka Federation of Khasi Jaintia and Garo People (FKJGP), Bataw Unit bad Lama Unit ki la leit ïakynduh ïa u Manager ka Jio Company haka ophis treikam kaba don ha Jowai ban ujor halor ka jingtlot ka rukom shakri ka Company Jio ha ki ar shnong.

Haba ïakynduh bad u Manager jong katei ka kompani ba la lamkhmat da u President FKJGP Bataw Unit u Deihok Sumer haka jingdonlang u President bad General Secretary ka FKJGP Lama Unit u H. Suchen bad L. Dong ki la pynsngew ïaka jingtlot jong ka Company ban ai jingshakri ïaki ar shnong ka Bataw bad ka Lama, East Jaiñtia Hills District.

Kitei ki nongïalam ki la ong, ba paidbah ba pyndonkam ïaka simcard Jio ki shem jingeh jingshitom namar ba tang shu lip ka bording ka network Jio ruh ka jah noh.

Ka jingbymlah jong ka Company jio ban ai jingshakri ïaki paidbah khamtam haki thaiñ nongkyndong ka ktah ym tang ïaki kam ki jam hynrei wat ïaka pule puthi jong ki khynnah khamtam mynta ba shaniah beit haka internet ban pyndep ïaki kam ki jam kumjuh ki online class namar ka jingwan arsien ka khlam COVID-19 hapoh ka ri bad Jylla.

Kumta halor kane ka bynta ka FKJGP Bataw bad Lama Unit ki la kyrpad ïaka Company Jio bad ïaki bor ba dei peit ba kin shimkhia ban pynbha pynmiat ïaka network Jio ha kitei ki Ar shnong khnang ban suk ki paidbah ba pyndonkam ïaka Jio Simcard.