Dawa ka FKJGP ban shna iew ba paka ha Amlarem ban kyntiew iaka ioh ka kot u nongshong shnong

Syllad | The Rising MeghalayaJuly 11, 2021

Ka Federation of Khasi Jaintia and Garo People (FKJGP), War Jaintia Circle kala dawa na sorkar ban thaw lad noh ban wanrah iaka iew ne ka Lay Bay Market kaba biang ha Amlarem ka jaka pdeng ka sub division, ban iarap  ia ki Nongrep bad ki nongseng kam lajong ban kin ioh die iaki mar ba pynmih ha Amlarem Sub Division.

Ka FKJGP lyngba u Shlur Mukhim president bad u Reachinson Kongwang general secretary kila ong ba ki jhur ki jhep bad ki mar ki matta kiba ki la pynmih na kane ka thain ka shitom bha ban pyniaid iew namar bym don ki basa iew kiba paka bad la shu die sha madan madiah bad ki nongrep bad ki nongkhaii ki hap ban shah ia u slap u phria bad la lap ba shu sniew lut ki mar ki matta bad ki jhur ki jhep kaba wanrah ka jingduh nong kaba khraw ia u paid nongrep bad nongkhaii ka thain.

“Ka por kala dei eh iaka sorkar bad u MLA ka thain ban phai khmat ha kane ka bynta ban kyntiew iaki nongkhaii bad ki paid nongrep namar ba ka war Jaintia hi ka pynmih shibun ki soh ki pai bad ki marrep,” la ong u Shlur Mukhim.

Une u nongialam ula ong ba ka sorkar kadei ruh ban phai sha kiwei kiwei ki lad iohkam iohjam bad ban iarap iaki samla kiba seng kam lajong ha ban plie iaki karkhana welding, ki furniture, ki kam shet jingbam bad kiwei kiwei. Ki don bun samla kiba la sdang har rukom ki jaitkam, hynrei namar ka jingbym ioh lad jingiarap kila shem jingeh ban pyndap pynbiang iaka jingdawa.

KA FKJGP ka Socio Economic movement kan sdang noh shen ia ki prokram ba kyrpang na ka bynta ban wad ki lad ki lynti da kumno ban leh ban iarap da kab hikai bad ban wad ia ki jingeh jong ki Nongrep bad ki nongseng kam lajong khnang ba kin lah ban ieng rasong bad ban pyniar iaka kam.