Dawa ka FKJGP ia ka NIFT ban pynkylla ia ka tender ba thmu ailad ia ki agency na shabar jylla

Syllad | The Rising MeghalayaJanuary 29, 2025

Ka Seng Federation of Khasi Jaintia and Garo People (FKJGP) ha ka 28 tarik Kyllalyngkot ka la dawa na ki bor pyniaid jong ka National Institute of Fashion Technology (NIFT) ba kin pynkylla noh mardor ia ka tender ba la pynmih ha ka 15 tarik u Kyllalyngkot namar ka jingpyrshang ban ailad ia ki agency kiba na shabar ka jylla.

Ha ka shithi sha u Director ka NIFT u Shankar Kumar Jha, u Vice President ka FKJGP u Kitboklang Nongphlang u la ong, “Kumta nga kyntu ia phi ban pynkylla noh mardor ia kane ka tender tad ynda la wanrah ia ki kyndon thymmai ki ban pynmyntoi ia ki agency kiba dei jong ki trai ri trai muluk ka Jylla.”

U la kynnoh ruh ba ka tender ba la pynmih da ka NIFT, Shillong katkum ki kyndon ha ka Bid Evaluation Sheet Annexure-ll ka paw shai kdar ia ka jingailad ban pynmyntoi bad iarap ban plie lynti ia ki agency kiba na shabar ka jylla Meghalaya bad ban pynduh lad ia ki agency jongki trai muluk ka jylla.U la ong ruh ba kane ka dei ka jingleh kaba ma shibun bad kaba pynduh mynsiem ia ki agency jong ki trai ri trai muluk.

U Bah Nongphlang u la pynpaw ruh ha ka shithi da kaba ong, “Ki don katto katne ki kyndon ha ka Bid Evaluation Sheet Annexure-l| Sl.No 1 para 3 ba ka jingmih pisa ha ka shi snem ha kine ki lai snem ba la leit noh ka dei ban long palat T.100 klur, bad katkum ka Sl.No. 2 para 1 kaba la pynpaw shai kdar ba ka jingmih pisa ha kine ki lai snem ka long T.100 klur haduh T.300 klur. Nalor kata ha ka Sl. No. 3 para 1 la ong ba haduh 2000 ngut ki nongap pahara ne Secuirty Personal ba siew da ka tulop kat haduh mynta.”

“Kine ki kyndon ba la kdew ha ka tender ka dei ka jingthmu ban ailad bad pynmyntoi ia ki kompeni / agency /firm kiba na shabar ka jylla Meghalaya namar kane ka Institute ka don tang 20 akar kaba donkam la kmno kumno ruh tang 100-150 ngut ki nongap pahara, hynrei ka kyndon ba ai marks ban buh nong pahara ka long haduh 2000 ngut ka dei ka bym lah ban pdiang da ka seng,” u la ong.

“Ka FKJGP ka sngew ba kine ki kyndon ba la buh ha ka Bid Evaluation Sheet ki long palat ia ka jinglah bad jingkot bor jong ki Agency / firm jong ki trai muluk ka jylla bad ki ban pynmyntoi beit beit ia ki agency kiba na shabar,” u la bynrap.