Dawa ka FKJGP na u Dy CM ban aiti noh ia ki iing ba duk ha Nongmensong

Syllad | The Rising MeghalayaOctober 31, 2024

Ka Federation of Khasi Jaintia and Garo People (FKJGP) ha ka 31 tarik u Risaw ka la dawa na u Symbud Myntri Rangbah ka Jylla u Bah Sniawbhalang Dhar uba khmih ia ka Tnad Urban ba un tuklar lem khnang ban lah ban pyndep bad aiti noh ia ki iing ba duk hapoh Nongmensong Lumphira.

Hadien ba la aiti ia ka dorkhas sha une u Myntri, u General Secretary ka FKJGP Nongmensong Circle u samla Alan Kharkongor u la ong ba ka jingbym lah ban pyndep ia ki project iing baduk kiba don ha Nongmensong Lumphira kiba thmu na ka bynta ki longiing baduk mynta ki la kylla long pynban ki ktem kam sniew ba bunjait, kata kynthup naduh ki kam khaii drok, ki kam tuh bad kiwei pat ki kam pyntriem ba shyrkhei. 

U la ong ruh ba ka jingdon jong kine ki kam sniew kam smeh ka la ktah jur ia ka jinglong jingman jong ki nongshong shnong ha ki thain ba marjan bad kaba wanrah ruh ia ka jingsyier bad ka jingbym shongshngain.

“Ki project kiba thmu na ka bynta ban aijingmyntoi ia ki briew kiba donkam jingiarap hynrei ki la wanrah pynban ia ka jingma kaba khraw ia ki shnong ki shna bad ka imlang sahlang baroh kawei,” u la ong.

U samla Alan ula iathuh ba ki don 4 tylli ki jingtei (building) ha Nongmensong kiba la tei ban sam sha ki longiing kiba duk ia kiba la dep ban tei naduh u snem 2008-2009 hynrei kiba la sdang ban julor biang.

“Namar kata ngi kyntu jur ia ka Tnad Urban lyngba u Myntri ba dei khmih ba kan shim mardor ia ki sienjam ban pyndep noh mardor ia kine ki jingtei lane ban shim ia ki sienjam ban khanglad ia ki kam beain ha kine ki jaka khnang ban khanglad ia ka jingsaphriang jong ki kam sniew bad ban pynthikna ba ki longiing baduk kin ioh ban shong ban sah noh kham kloi ha kine ki jaka kumba la kular,” u la bynrap.