Dawa ka HANM ban shna da ka surok four lane na Jowai sha Ratacherra

Syllad | The Rising MeghalayaAugust 30, 2023

Ka Hynñiewtrep Achik National Movement (HANM) Jaiñtia zone ka dawa na ka sorkar ban shna noh da ka surok Four lane naduh Jowai bypass shaduh Ratacherra khnang ban pynsuk ia ka leit ka wan jong ki paidbah ka thain Rilum Jaiñtia bad ruh ban lait na ka jingtwa khyndew kaba ju jia man la ka por ha ka thain Sonapur.

Ka HANM ka la ong ruh ba dei tang kane ka lad ka ban lah ban pyllait na ka jingdheng kali kaba jia man ka sngi. Ka HANM ka la pynpaw ba kane ka surok national highway na Jaintia ka dei ruh ka surok kaba wat ki briew kiba na bar ka jylla ruh ki ju iaid lyngba bad ka long ka jinglehrain ia ka sorkar lada jia khah khah ki jingtwa khyndew bad  jingdheng kali.

Nalor kata ka HANM ha u kyrwoh lyngba u president, u Shaniahlang Suchen ka la ong ruh ba tang shu poi ka lyiur ba jur slap ki don beit ki jingjia twa khyndew bad ka jingdap um ha kane ka lynti surok bad kaba buh ruh ka jingma shibun ia ki paidbah nongliet nongwan. Ka seng ka kyntu ruh ia ka sorkar ba ka dei ban shim khia ia kane bad lada kam lah ban hi ka sorkar kan hap ban shim ia ka jingkitkhlieh ia ka iaid ka ieng bad ka leit ka wan jong ki paidbah.

Shuh shuh ha kaba iadei bad ka jingkit palat pud ki trok kit mawshun ka liang ka seng ka dawa na ka sorkar ba kan khang noh shisyndon ia  ki trok kiba kit mawshun kiba kit palat pud. Ka la ong ruh ba ka jingioh lad jong kine ki trok kit mawshun ba kit palat pud naduh Lumshnong shaduh Malidor ka dei kawei na ki mat ba kongsan khnang ba kan ym ktah bad pynjulor ia ka surok hapoh ka thain. Ka HANM ka la ong ruh ba ka jingkit palat pud jong ki kali kit mawshun kan sa pynjulor ia ka lynti surok naduh Mynkre shaduh Malidor.

Kumta na ka liang ka HANM kala maham ba lada ka sorkar kam leh eiei halor kane ka HANM kam banse ban leh da ki kam ban pyrshah ia kito ki kali kit mawshun kiba kit palat pud kaba long pyrshah ruh ia ka hukum jong ka iingbishar High Court.