Dawa ka HANM na ka Sorkar ban thung doktor specialist ha ka District Hospital ha WKH

Syllad | The Rising MeghalayaMarch 19, 2025

Ka Hynniewtrep Achik National Movement (HANM) ha ka 18 tarik Lber ka la dawa na ka sorkar Jylla ba kan thung ia ki doktor specialist hapoh ka District Hospital ha West Khasi Hills District.

Ha ka shithi sha ka Myntri ka Tnad ka koit ka khiah ka Kong Ampareen Lyngdoh, u president ka HANM u Bah Gabriel Sohlang u la ong, “Ngi kyntu jur ia phi ba phin shim kongsan ia kane ka jingkyrpad bad ban shim ia ki sienjam ba donkam ban pynkhlain ia ki lad aijingsumar ha ka thain West Khasi Hills District.”

Une u nongialam ka seng u la ong ruh ba ka District Hospital ka donkam ia ki doktor specialist kiba kynthup ia u Orthopaedic Surgeon – khnang ban tehlakam halor ka jingkiew ka jingdon jong ki nongpang kiba iadei bad ki jingmynsaw bad ki shyieng, Doktor  Radiologist – ban pynthikna halor ki lad jingsumar kiba biang ha kaba wad bniah ia ki jingpang jingshitom, Oncologist – ban pynioh ia ki lad jinsumar kiba biang na ka bynta ki jingpang bampong ne cancer Biochemist –Ban pynkhlain ia ka jinshakri  ha ka laboratory bad ki jingwad bniah halor ki jingpang, Pathologist – ban kyntiew bad pynbha ia ki lad jingsumar bad jingkhmih bniah, Psychiatrist – Ban ialeh pyrshah ia ki jingeh na ka jingkiew ha ka liang ka koit ka khiah kaba ktah ia ka bor pyrkhat pyrdain, Obstetrician & Gynaecologist – Ban ai ia ki lad jingsumar kiba kham kyrpang ia ki longkmie bad khunlung bad doktor Paediatrician ban pynbiang ia  ki lad jingsumar kiba iadei na ka bynta ki khunlung khynnah.

Kumba ka long mynta ka Seng ka la ong ba don tang kawei ka Gynaecologist bad kawei ka Paediatrician hapoh ka District Hospital kaba la pynshem jingeh ban pynbiang ia ki lad jingsumar ia ki nongpang hapoh ka district baroh kawei.

Ka Seng ka la ong ruh ba ka jingbym don ia kine ki doktor specialist ka la pynbor ia ki nongpang ba kin hap ban leit shaduh sha Shillong lane sha Guwahati bad kaba la ktah jur ha ka liang ka pisa tyngka bad ka bor met bor phad, kata da kaba bynrap ruh ba ka jingmang ia kine ki kam kan pynbha shibun ia ki lad jingsumar ia ki nongpang hapoh ka district.