Dawa ka HITO ban pynshitom tyngeh ia ki sawngut ki runar kiba leh beijot ia ka longkmie

Syllad | The Rising MeghalayaApril 24, 2024

Ka Seng Hynniewtrep Integrated Territorial Organization (HITO) Students’ Wing ha ka 24 tarik mynta u bnai ka la dawa ban shim da ki jingpynshitom ba tyngeh pyrshah ia ki runar kiba donkti ha kaba leh beijot kynhun ia kawei ka longkmie ha ka jingjia kaba la jia dang shen ha ka nongbah Shillong.

“Ngi dawa jur ban pynshitom pyrshah ia ki runar kiba donkti ha ka jingjia shah leh beijot ba dang shen jong kawei ka kynthei briew hadien ba  ka la shah pyndih da ki jingdih pynbuaid ha ki sawngut ki samla ha kaba ka video jong kane ka jingjia ruh ka la saphriang lyngba ki rynsan social media bapher bapher,” ong u chairman ka Students’ Wing u Iajanlang Sohtun ha ka shithi sha u Superintendent of Police ka East Khasi Hills District.

“Nalor kata ngi dawa ruh ban pynshitom pyrshah ia kito ki briew kiba pynsaphriang ia ka video ha ki rynsan social media. Ngi kwha ruh ba kito ki runar kiba donkti ki dei ban shah pynngat ha ki kyndon ain kiba tyngeh khnang ba kin ym ioh jamin, bad ngi dawa ruh ban kem mardor ia kine kiba donkti bad ban pynngat ha ki kyndon ain kiba tyngeh khnang ba kan long ka nuksa na ka bynta kiwei pat ki riew bymman bad khnang ban lah ban tehlakam ia kiba kum kine ki jingjia nangne shakhmat,” u la bynrap.

Ha kawei pat ka bynta na ka liang ki bor pulit ki la ioh ban kem noh ia sawngut  kaba kynthup ia uwei u ba dang hapoh ka rta namar ka jingdonkti ha katei ka kam bymman.