Dawa ka HITO ban weng ia ka hukum khang ialum paidbah ha ka sngi niew vote

Syllad | The Rising MeghalayaMay 29, 2024

Ka Seng Hynniewtrep Integrated Territorial Organization (HITO) ha ka 28 tarik Jymmang, ka la dawa na u Returning Officer ka Shillong Parliamentary Constituency uba dei ruh Deputy Commissioner ka East Khasi Hills District, u SC Sadhu ba u dei ban weng noh ia ka jingpynmih hukum ban pynjari da ka kyndon 144 CrPC ha baroh kawei ka district ha ka sngi niew vote na ka bynta ka Lok Sabha ilekshon kaba la dep ka ban long ha ka 4 tarik u Jylliew 2024.

Ha ka dorkhas sha u Deputy Commissioner u President ka HITO u Bah Donbok Dkhar u la ong ba kane ka hukum ba la pynmih ha ka 23 tarik Jymmang kaba la khanglad ia ka jingiaid rally da kin kino ki kyrtong ne party sain pyrthei hadien ba la pynbna ia ka result ka long pyrshah ia ka hok jong u paidbah kumba la kdew ha ka Article 14 bad 19 jong ka Riti synshar Ri ne Constitution jong ka ri India lem bad ia kiwei pat ki hok ha ka synshar paidbah na ka bynta ki nongshong shnong jong ka ri.

U President HITO u la ong ba ka jingpynmih ia kane ka hukum ka long ka bym don nongrim bad ka bym shongnia satia namar ki paidbah ki don ia ka hok ban jied ia ki nongmihkhmat bad ruh ban ialehkmen na ka bynta ki kyrtong jong ki kiba ioh ia ka jingjop, kata la kilong na kino kino ki party sain pyrthei.

“Ka rukom pynpaw jong kane ka hukum ban khang ia kino kino ki jingiaid rally bad kiwei pat ha baroh kawei ka district khlem ki daw bad ki nongrim kiba biang ka long kaba sngew bynniaw shibun. Nalor kata la pyntreikam ia kane ka hukum khlem da bishar bniah kan ktah khlem nongrim ia ki paidbah babun balang,” u la bynrap.

Nalor kata u Bah Donbok u la kdew ruh ba ka jinglong jingman kumba ka long mynta kim don satia kino kino ki jingjia jong ka jingiakynad bad ka jingkdew halor kiba kum kine ki jingjia ka long ka bym don nongrim, hynrei lyngba kane ka jingpynmih hukum baroh ki nongshong shnong hapoh East Khasi Hills ki la shah pynduh noh ia ki hok bad ka jinglaitluid ka jong ki ban pynpaw, ha ka liang ka leit ka wan bad ban pynlong ia ka jingialum paidbah, jingialang, rally bad kiwei pat da ka lynti jong ka jingjaijai, kata katba ia ki jingiakhih ba jai jai, ki proseshon bad kiwei pat la ju pynlong khlem kano kano ka jingpynkhein kyndon ha baroh ki bynta jong ka nongbah.

“Kumta ruh haba pynshong nongrim halor kitei ki jingshisha baroh, ka Seng ka kyrpad jur ia phi ba phin weng noh ia katei ka hukum ba la pynmih ha ka 23 tarik Jymmang khnang ba ki hok jong ki paidbah nongshong shnong kin ym shah iuhroit bad shah ktah,” ong shuh shuh utei u nongialam ha ka dorkhas.