Dawa ka HITO ia ka EC-KHADC ban tohkit bad leh tyngeh ia ki khyrdop lum khajna beain

Syllad | The Rising MeghalayaApril 1, 2025

Ka Hynniewtrep Integrated Territorial Organisation (HITO) ha ka 1 tarik Iaiong ka la dawa ia ka Executive Committee jong ka Voice of the People Party (VPP) ha Khasi Hills Autonomous District Council (KHADC) ba kan pynlong ia ka jingtohkit kaba bniah bad ban leh tyngeh ia ka jinglum khajna beain da ki khyrdop jong ka Council.

Ha ka shithi sha u Chief Executive Member (CEM) ka KHADC u Bah Shemborlang Rynjah, ka HITO ka la ong, “Ngi dawa ban pynlong ia ka jingtohkit kaba mardor halor kine ki kam beain bad dei ban shim da ka lynti jong ka ain pyrshah ia kiba donkti bad ban pynduh noh ia ki tender bad kontrak ba la bat da ki trai jong ki khyrdop ba la lap ia ki kam leh thok bad ban pynthikna ba kim dei ban iohlad shuh ban aplai tender ne kontrak hadien habud.”

Kane ka jingdawa ka la wan long hadien ba ka seng ka la ioh pdiang ia ki jingtip halor ki jinglum khajna beain da ki katto katne ki briew kiba dona ha ki khyrdop jong ka KHADC kiba lum khajna khamtam na ki kali kit mar.

Haba wad ia ki jingshisha, ka HITO ka la ong ba ka la pynlong ia ka jingleit jurip ia ki khyrdop Forest ka KHADC ha Puriang, East Khasi Hills ha kaba ka la lap ia ki sakhi satar kiba biang ban pynskhem ia kine ki jingkynnoh kiba khia shibun.

“Ha ka jingtohkit ka jong ngi la lap ba uwei u briew uba don ka jingkitkhlieh halor kane ka kam ha ka khydop talasi u la lum pisa beain na ki kali kiba iaid lyngba ka surok bah. Kaba sngew bynniaw ka long ruh ba kito ki nongniah kali kiba ialeh pyrshah ia kane ka jinglum pisa ki ngat ha ka jingshah byrthen ban kurup ia ki mar ki jong ki, kaba la wanrah ia ka jingsyier bad jingpynbor,” ong ka seng ha ka shithi da kaba bynrap, “ Ka la poi sha ka jingtipba u trai jong ka khyrdop u la ai ka hukum ia ki nongtrei kaba la pynlong ia ki ba kin pyntreikam ia kum kine ki kam bamsap.” 

Kane ka kam thombor ka la long ruh wat ia ki kali kamai kaba la pynkylla sohpdung ia ki nongtrei bad ki nongbylla sngi kiba shaniah ia ka kamai kajih da kaba khaii ia ki mar ba kongsan kum u rnga bad ki lyntang. Kiba kum kine ki jingleh ki pynpaw halor ki kam bamsap bad ki kam leh donbor ba jur da kito kiba trei hapoh ki khyrdop.

Ha kajuh ka por ka HITO ka la kam ba kane ka jingpynpaw jong ka seng ka dei kaba la pynshong nongrim lyngba ki sakhi satar ba la kyrshan da ki sakhi bad ym dei ban shim ia ka kum ki jingkam ki bym lah ban pynshisha.Ngi long kiba kloi ban wanrah ia ki sakhi satar bad ki jingai sakhi ban pynshisha halor kane ka jingsngewkhia ka jong ngi lada donkam.

Kaba sngewsih ka long ba kane ka jingjia kam dei kaba shu jia ryngkhat, hynrei ka dei ka jingleh donbor kaba la leh lyndet da ka Sorkar bad ki Council kiba la leit noh bad kaba la wanrah pat ka jingeh jingjynjar ia ki nongtrei bylla kiba trei shitom bad ki dkhot  kiba trei na ka bynta ka imlang ka sahlang.

“Kumta ngi kyntu jur ia phi ban shim ia ki sienjam ba tyngeh pyrshah ia kito kiba donkti, kata la ki dei ki trai ne ki nongtrei jong ki khyrdop,” bynrap ka seng.