Dawa ka HITO ia u DC Jowai ban khang iaka iew masi beain ha Mookyndur

Syllad | The Rising MeghalayaAugust 10, 2023

Ka Hynniewtrep Integrated Territorial Organisation (HITO), West Jaintia Hills District haka sngi Balang kala ai da ka jingthoh sha u Deputy Commossioner, West Jaintia Hills ha kaba ka la dawa ban khang khyrdep shisyndon ia ka jingmih jong ka iew masi beain ha ka shnong Mookyndur kaba buh jingma na ka jingpang iabit ia kiwei pat ki jingri jong ki trai shnong hapoh ka thain.

Na ka liang ka HITO ka la ong ba kane ka jaka iew ka dei kaba la long trai da u Ma Nicholas Rymbai bad la kynnoh ba ym shym la don satia ki doktor na ka tnat veterinary ki ban khmih bad ai syrnot na ka bynta kine ki jingri la ki dei ne em kiba don jingpang iabit bad kiwei pat ki khniang jingpang.

Ka HITO ha u kyrwoh lyngba u Wanbiang Pulang president bad u Lakhon Dkhar general secretary HITO Thadlaskein Unit bad u general secretary ka HITO Mookyndur Unit u Ma Bonny Pakma ki la pynpaw ruh ba ha kine ki khyndiat taiew ba la dep ki la don ki masi bad ki muid kiba la iap ia kiba la bret ha ki bynta jong ka shnong Mookyndur bad ruh ha ka lynti surok national highway kaba la buh jingma ia ki nongri jingri jong ka thain na ka jinglah ban saphriang ka jingpang iabit lyngba kine ki jingri kiba la iap bad pyut.

Kumta na ka liang ka HITO ka kyntu jur ba dei ban khang mardor ia kiba kum kine ki jaka iew beain kiba ki bym khuid bad kiba long lyngkar na ka bynta ka jingshngain jong ki nongri jingri bad ki nongshong shnong.

Nalor kata ka Seng ka la ong ruh ba ka jingmih jong kane ka iew ka la pynkhein ruh ia ki kyndon 47 haduh 56 jong ka Transport of Animals Rules 1978, bad kumta dei ban shim ia ka jingpynshitom katkum ka ain.

Ha kawei pat ka bynta ka HITO ka la ong ruh ba lyngba kane ka iew la khaii beain ia ki masi bad ki muid shapoh Bangladesh khlem ki kot ki sla kiba biang ban pynshisha shano sha phah ne die ia kine ki masi.

Kumta halor kine ki nongrim ba la dew na ka liang ka seng ka kyntu jur ia une u heh ka district bad un shim ka jingpynshitom katkum ka ain.