Dawa ka HYC ban kem mardor ia u shit niam ba pyrta ‘Jai Shree Ram’ hapoh ka iingmane ha Mawlynnong

Syllad | The Rising MeghalayaDecember 29, 2024

Ka Seng Hynniewtrep Youth Council (HYC) Central Executive Council ka pynrem jur ia ka jingleh kam beain jong u shitniam uba pyrta ‘Jai Shree Ram’ hapoh kawei ka iingmane Khristan ha ka shnong Mawlynnong, East Khasi Hills kaba la jia dang ha kine ki khyndiat sngi ba la dep.

Ka Seng ha u kyrwoh lyngba u President u Bah Roy Kupar Synrem ka la ong ba ka jingleh jong une u briew uba kyrteng u Akash Sagar kaba la ktah jur ia ka jinglong kyntang jong ka iingmane bad ka dei ka jingleh kam thombor pyrshah ia ki riewngeit Khristan bad ka jingthmu ban pynmih ia ka jingsngew iapher niam hapoh ka jylla bad ban pynbor ia ki mat ne agenda jong ki heh paid ia kaba ym lah ban pdiang.

Ka HYC ka la dawa na ka Tnad pulit ba ka dei ban kem mardor ia une u briew kumjuh ia kiwei pat kiba don bynta lada ki don bad ban pynthikna ba udei ban ioh ia ka jingpynsaja katkum ki kyndon ain. Ki bor ka ain ki dei ban pyni ia ka nuksa kaba biang ha kaba iadei bad katei ka jingjia khnang ba kum kine ki jingjia kin ym jia shuh hadien habud bad khnang ba yn ym don shuh ki ban shlan ban leh ia ki kam niewbein ia ka niam Khristan ha ka jylla.

U president ka HYC u kyntu ruh ia ka sorkar bad baroh kiba don bynta khamtam kiba don bynta ha ki kam jngohkai ba kim dei ban shim sting ia katei ka jingleh kam beain hynrei ban pynsngewthuh mardor sha ki nongwan shangkai pyrthei kiba wan jngoh sha kane ka jylla ba kin long kiba adkar ha kaba iadei bad ka jingsngew jong ki nongshong shnong ka jylla kiba don ha kino kino ki jingngeit niam, bad ban don ruh ia ki kyndon treikam kiba hap ban bud pyrkhing haba leit jurip ia kino kino ki jaka khamtam ki jaka lehniam bad ki jaka ba kyntang.