Dawa ka HYC ban pynialeh eksam biang ia ka kam Nursing ha NEIGRIHMS ba bun kiba khlem wan trei
Ka Hynniewtrep Youths’ Council (HYC) Central Body ka la dawa na u Director ka North-Eastern Indira Gandhi Regional Institute of Health and Medical Sciences (NEIGRIHMS) ban pynlong biang da kawei pat ka eksam kaba thymmai na ka bynta ka kam Nursing bad ym ban thung da kiba la don lypa ha ka waiting list hadien ba jan mar shiteng na kiba pass kim shym la wan pyniasoh ne join ia ka kam bad don ruh kiba la pep noh.
Ha kane ka jingleit iakynduh ia utei u Director ka NEIGRIHMS ha ka 22 tarik Jymmang, ka HYC hapoh ka jingialam jong u president u Bah Roy Kupar Synrem ka la ong ba katkum ki jingtip kiba ka la ioh la ong ba ki don haduh kumba 40 haduh 50 ngut kiba la shah thung ha ka kam Nursing Officer ha ka jingpynrung kam kaba la dep dang shen lyngba ka NORCET lehse kim shym la wan join/pyntip lane ki la resain na ka kam.
![](https://www.syllad.com/wp-content/uploads/2024/09/JIT-Vacancy-823x1024.avif)
Halor kane ka HYC ha ka memorandum sha u Director ka NEIGRIHM ka la maham ba kan ym pdiang da lei lei ruh halor kano kano ka jingthmu ban pyndap ia kine ki jaka kiba thylli lyngba kito kiba don lypa ha ka waiting list kumba ka la dep ban kren shai ha ka jingialang kaba la dep bad une u Director.
Ka la ong ruh ba dei ban shim da ka sienjam ban pynlong da ka jingpyrnung kam kaba thymmai da ka NEIGRIHMS hi, kata da kaba pyndonkam lyngba ka OMR method na ka bynta ban pynkloi bad ka jingiaid beit
Kumjuh ka Seng ka la dawa ruh na ka bynta ban mang kham bun ki seat na ka bynta ki samla kiba dei ki trai jylla ha kaba iadei bad ka jingpule Doktor ne MBBS hapoh kane ka Institute namar katkum ka admission notice jong u snem 2023-2024 ka long tang 14 na ki 50 tylli ki seat.
U president ka HYC u la ong ba ka Nagaland ka ioh 10 bad ka open to All North Eastern States kaba kynthup ia ka Sikkim ki ioh 18 seat. Kumta kumba ka long kiwei pat ki jylla ka thain Northeast kaba kynthup ia ka Nagaland ki la dep ban sdang ia ki medical college ha la ki jong ki jylla.
Kumta ka HYC ka dawa ba dei ban kyntiew noh ia ka seat na ka bynta ka jylla Meghalaya na katei ka session kaba la dep.
Haba iadei bad ka bhah pule M.Sc Nursing and B.Sc Nursing, u president ka HYC ula iathuh ba haduh mynta kam pat don ka jingbhah lypa (Quota) naka bynta ki samla pule ka Meghalaya. Kumta ka Seng ka la dawa na ka Institute ba ka dei ban shim ia ki sienjam ban bhah kyrpang ki seat ia ki samla trai shnong ka Jylla naduh ka session 2024 shaneng bad ym da kaba pynshong nongrim na ka jingpass bha ia ka eksam All India NEET.
Leave a Reply