Dawa ka HYC ia ka SCB ban kyndang noh mardor ia kiba shong beain ha Lum Survey

Syllad | The Rising MeghalayaApril 27, 2024

Ka Hynniewtrep Youth Council (HYC) ka la dawa na ka Shillong Cantonment Board (SCB) ba ka dei ban kyndang noh mardor ia ki briew kiba shong ba sah beain ha Lum Survey kaba don marjan bad ka Tnat Fire Emergency Services ha ka thain Iewduh.

Ka HYC haka 26 tarik Iaiong, ka la leit ban pynsngew ia kane ka bynta ha u Chief Executive Officer (CEO) ka SCB shi sngi hadien ba ka la pynlong ka jingleit jurip ia katei ka jaka ha kaba ka la don ba ki la don haduh kumba 80-100 tylli ki iing kiba shong beain ha kane ka jaka kaba la iasyriem ruh ba ki jaka slum.

Haba kren sha ki lad pathai khubor, u president ka Seng u Bah Roykupar Synrem u la pyntip ba ha kaba iadei bad kane ka bynta na ka liang ka Seng ka la aiti ruh da ka memorandum sha u CEO.

“Ngi la iakynduh ia u CEO ha kaba ngi la dawa ba ki dei ban shim mardor ia ki sienjam ban kyndang ia baroh kine ki briew kiba shong beain ha kane ka jaka bad ban pynpra ia baroh ki jingtei kiba don ha kane ka jaka,” ong u president ka Seng.

Nalor kata u la pyntip ruh ba ha kane ka jingiakynduh na ka liang u CEO u la pyntip ba kane ka bynta jong ka jaka watla ka hap hapoh ka SCB, hynrei ki bor ba dei khmih ia kane ka jaka ka dei ka tnat shipai kaba don ia ka ophis treikam ha Guwahati.

U la ong ruh ba ka seng ka la kyrpad ia u CEO ba un jubab ia kane ka shithi halor kiei ki sienjam ban shim khnang ba kin leit sha ki bor kiba dei ia kaba u la pynthikna ha ki ba un sa jubab shen. Kumta ruh da kaba pynshong nongrim ka seng HYC kan shim ia ki sienjam ban pynthikna ba kine ki briew kiba shong beain kin shah kyndang noh na kane ka jaka kloi katba lah.

Ha katei ka jingleit jurip ha ka 25 tarik Iaiong, ka Seng ka la ioh jingtip ruh ba ha kane ka jaka ki don shibun bah ki kam beain, kata kum ki kam khaii drok bad ka dei ruh ka jaka shongrieh jong ki phetwir kiba wan na kiwei pat ki ri, bad na ka liang ka Seng ka kyndit jur ba kumno ki bor ba dei khmih kim shym la phaikhmat bad shim khia halor kiba kum kine ki kam shong shnong beain kiba la wan jia hapdeng jong ka nongbah ka Jylla.

Shuh shuh President ka HYC ula iathuh ba kane ka jaka ka dei kaba rit bad kaba don tang kumba 10 haduh 20,000 square feet, hynrei kaba sngew lyngngoh ba kin don haduh jan palat 100 tylli ki longing kiba shong ba sah ha kane ka jaka.