Dawa ka HYC ia ka Sorkar ban khang ia ka ‘Yatra’ ka seng Hindu ha Shillong

Syllad | The Rising MeghalayaSeptember 14, 2024

Ka Hynniewtrep Youth Council (HYC) ha ka 13 tarik Nailur kala dawa ia ka Sorkar Jylla ba kam dei satia ban shah pynlong ia ka Gau Pratishtha Andolan: Gau Dhwaj Sthapana Bharat Yatra ia kaba la pynbeit da ka Seng Hindu ban pynlong ha ka 2 tarik Risaw ha Shillong.

“Na ka bynta ban pynneh ia ka shongsuk shongsain, la kyntu ia ka sorkar Jylla ba kam dei ban ailad ia kaba kum kane ka ‘Yatra’ lane ia kino kino ki prokram ba kin ioh ban wan rung sha ka Jylla jong ngi kumba la pynbna da ki nongpyniaid jong katei ka kynhun seng Hindu,” ong u President ka HYC u Bah Roy Kupar Synrem ha ka dorkhas sha u Myntri Rangbah ka Jylla u Conrad K Sangma.

Nalor kata u la ong ba ka jingbam doh Masi ka dei shibynta jong ka jingim jong kiba bun ki nongshong shnong ka Jylla Meghalaya, nalor ka dei ruh ka bynta jong ka kamai kajih ia ki hajar ngut ki nongshong shnong kiba don bynta ha ki kam shalan bad die ia ka doh ha ka Jylla.

“Katba ma ngi ngim ju pynbor ia kiwei halor kaei kaba ki dei ban bam bad kaei ka ba kim dei ban bam, kumta ngi pyrshah jur ia kino kino ki bor ne kynhun kiba thmu ban pynbor ia ka rukom bam ne ka rukom ngeit jong ngi” ong une u nongialam ka HYC da kaba bynta “Nalor kane “Ka Kmie ka dei kaba niewkor bha ha ka imlang sahlang jong ngi ki paid Hynniewtrep bad ban nujor ia ki bad ka “masi’ ne ‘ksew’ ka dei ka kam sang ha ka imlang sahlang jong ngi. Kumta ngi pyrshah jur ia kane ka jingpyrshang bad ka jingthmu jong kino kino ki kynhun ban hukum ia ngi ba ngin khein ia ka Masi kum ki Kmie jong ngi.”            

Nalor kata u la bynrap ruh da kaba ong, “Kane ka jingthmu ban pynlong ia kane ka Yatra ka dei ruh ka jingkhot ia ka Sorkar India ba kan khang noh halor ka jingpyniap ia ki Masi bad ia ka jingbam ia ka doh Masi ha India bad ban pynbna ia ka Masi kum ka “Kmie ka Ri” kam dei kaei kaei ruh hynrei ka jingpyrshang ban pynmih ia ka jingsngew iapher jaidbynriew hapdeng ki kynhun bad niam bapher bapher ha ka Jylla jong ngi kaba don hapdeng ka jingim suk im sain kat haduh mynta.”