Dawa ka HYC na ka sorkar ban ai trei iaka skim um New Shillong sha ki kontraktor trai Jylla
Ka seng Hynniewtrep Youth Council (HYC) ha ka 26 tarik Naitung ka la dawa na ka sorkar ba ka dei ban ai pyntrei noh sha ki kontraktor trai muluk ka Jylla ha kaba iadei bad ka jingpyntrei ia ka New Shillong Water Supply Scheme bad ruh ia kiwei kiwei pat ki project ba la bei da ka sorkar Jylla.
Ha ka shithi sha u Myntri ka tnad PHE u Marcuise N Marak, u President ka HYC u samla Roykupar Synrem u la ong, “Ngi dawa na ki tnad ba dei khmih ban shim ia ki sienjam bad ban pynkhreh ia ki kyndon ki ban pynthikna ha kata ka rukom ba ki kontraktor trai muluk ka Jylla kin lah ban iashimbynta ha ka jingiathep tender bad ruh ban ioh ia ka kam katkum ka jingkot bor ka jong ki”.
![](https://www.syllad.com/wp-content/uploads/2024/09/JIT-Vacancy-823x1024.avif)
Nalor kata u la ong ruh ba ka Seng ka tip bha ba ki don ki kontraktor trai muluk kiba lah ban pyntrei ia ki kam bapher bapher na ka bynta ki skhim bad project hapoh ka jylla, kata katkum ka jinglah ka jong ki.
U president ka HYC u la ong ruh ba ka sorkar jylla ka la sdang ia ka projek kaba heh tam kaba la bei tyngka da ka sorkar Jylla kaba dei ka project jong ka New Shillong Water Supply Scheme kaba la mang ha ka jinglut kaba haduh kumba T.1600 Klur, kaba dei ka projek kaba heh tam ba la shim ha ka histori ka jylla.
“Kumta, ngi dawa ia ki tnad bapher bapher ka sorkar Jylla ba lada don ki skhim ba mang tyngka da ka sorkar Jylla ne iabei lang, ki dei ban thaw ia ki kyndon ban pynthikna ba baroh ki kam jong kine ki skhim/project kin ioh da ki contractor trai muluk ka Jylla” ula ong ha ka shithi.
“Ngi ngeit skhem ba kane ka project ynda la dep, kan lah ban pynbiang ia ki jingdonkam jong ka nongbah Shillong bad New Shillong Township wat na ka bynta ki pateng ki ban dang wan. Ngi tip ba ka Skhim sam um bathymmai jong ka New Shillong ka dei ka skhim ba la kyrshan pura da ka sorkar Jylla, kumta ka tnad ka don ka jinglaitluid kaba pura ban thaw ia ki kyndon ha kaba iadei bad ka jingai kam ia kata ka Skhim ba la kdew. Ka Council ka tip bha ruh ba ki don ki kontraktor trai muluk ka Jylla kiba la lah ban shimti ia ki kam bapher bapher hapoh ka Scheme/Project katkum ka jingkotbor ka jong ki,” u la ong shuh shuh.
Leave a Reply