Dawa ka HYC na u DGP ban ym ailad ia ki kam pynsyier katba ka jingiapynbeit pud ka dang iaid

Syllad | The Rising MeghalayaAugust 22, 2023

Ka Seng Hynniewtrep Youths’ Council (HYC) CEC, Shillong, mynta ka sngi ka la leit ban iakynduh ia u  Director General of Police ka Meghalaya, u Dr. LR Bishnoi, IPS,  ha kaba ka la kyntu ba ym dei satia ban ailad ia kino kino ki kam byrngem byrsit bad pynsyier ia ki nongshong shnong ka jylla katba ka jingiapynbeit pud ka dang iaid shakhmat.

Ka HYC kala aiti ruh da ka jingthoh sha une u heh pulit ka la aijingmut ruh ba na ka bynta ban pynneh ia ki kam shongshngain ha ki thain khappud, bad dei ban pynthikna bad ailad ia ki paidbah kiba shong ba sah ha kine ki thain ba kin shim ia ka rai kaba laitluid la kin don shapoh Meghalaya ne Assam khlem kano kano ka jingpynbor na ka jingshah byrthen na kino kino ki liang.

Ka HYC ka pynkynmaw ruh halor ki jingkren byrthen jong ka sengbhalang na Karbi Anglong kaba la maham ba lada ki nongshong shnong kin jied ban leit sha Meghalaya, kan mih ka jingjia ka ban iasyriem bad kaei kaba la jia hapoh Manipur.Kane hi ka dei ka jingmaham ia ka mon ba laitluid jong u paidbah, bad na ka liang ka seng HYC ka pynrem jur ia kiba kum kine ki jingbyrthen.Kumta khnang ban pynthikna ba ki nongshong shnong kin shim ia ka rai kaba laitluid ka jingpynbiang ia ki bor pahara ha ki thain khappud kadei ban long kaba hakhmat eh.

Ka HYC ka aijingmut ruh ba ia baroh ki hynniew tylli ki Border Outpost (BoPs) kiba thymmai kumjuh ia ki Out-Posts (OPs) ha kito ki jaka kiba don jingsyier ha khappud bad ka Assam kumba la pynbna da ka sorkar jylla ha ka snem ba la dep dei ban pyntreikam pura, bad dei ban pynbun ia ka jingdon ki bor pahara ha ki BOP bad ki OP kiba la don lypa, bad ki bor pulit ki dei ban ioh ia baroh ki jingdonkam khnang ba kin lah ban pyndep ia la ki jong ki kamram.

Na ka liang ka HYC ka la ong ruh ba kane ka jingbyrthen jong katei ka seng na Karbi ka la wanrah ka jingiapher jaidbynriew hapdeng ki Khasi bad ki Karbi kiba shong ba sah ha ki thain khappud bad ka Meghalaya bad Assam.

Shuh shuh ka HYC kala aijingmut ruh ban pynkhlain ia ka tnat Infiltration da ka jingthmu ban khanglad ia ka jingwan rung beain jong ki briew kiba na bar bad ki bar ri kumjuh, kata da ka ba lum ruh ia ki jingtip na baroh ki kynhun, kata kum na ki VDP, ki Rangbah Shnong bad ki nongialam shnong ha kaba iadei bad kiba wan rung beain.

U Bah Robertjune Kharjahrin President bad u Bah Roy Kupar Synrem General Secretary ki la pynpaw ba kumba ka long mynta la sakhi ba ka jingtreikam jong ka tnat Directorate of Infiltration kam long satia kumba la khmih lynti jong u paidbah. Kumta ka HYC ka kyntu jur ia une u heh pulit ba un pynthikna ia ka jingtreikam jong kane ka tnat Infiltration khnang ban lah ban khanglad ia ka jingioh wan rung laitluid ki briew kiba na shabar ka jylla bad bar ri kumjuh.

Ha kajuh ka por ka HYC ka kyntu jur ruh ban shimkhia mardor ha kaba iadei bad ka jingwan tuid jong u drok sha ka jylla kaba la nangjur katba nangmih ki sngi, bad ka ngeit ruh ba lada ki bor pahara ki lah ban pynduna ia kane ka jingwan rung jong u drok sha ka jylla ka jinglong jingman kan kham kylla shibun.