Dawa ka HYC Sohïong Circle ban shna noh ïa ka kynroh kaba la twa ha Sohïong

Syllad | The Rising MeghalayaFebruary 5, 2021

Ka Hynñiewtrep Youths’ Council (HYC) Sohïong Circle ha ka 4tarik Rymphang, 2021 ka la leit ban jurip ïa ka kynroh jong ka surok bah Shillong-Nongstoiñ- Tura kaba la twa ha Sohïong.

Ka tei ka kynroh kaba la twa ha ka tei ka surok bah kaba don ha Sohïong bad ka la twa naduh ka aïom lyiur jong u snem 2020 bad ka la tap mar shiteng ïa ka surok bah bad ka don ha ka jaka kaba long khongwaiñ (turning) bad ka long ruh ka jaka kaba i mynsaw bha haduh katta katta ha kaba baroh arliang na katei ka jaka kaba khyllem ka dei ka jaka kaba long beit ha kaba ki nong ñiah kali ki juh pynher sted bha ïa ki kali.

Ka HYC kala pynpaw iaka jinglyngngoh kaba khraw halor ka jing shong kli kti jong ka tnad PWD khumjuh ruh jong ka Sorkar Meghalaya ha kaba haduh mynta ba lah jan mih sa ka aïom pyrem jong u snem 2021 ruh kam pat leh eiei hynrei ka dang ïai peitkai sah ïa ka tei ka kynroh kaba la twa lah slem.

U President ka HYC Sohiong u Purningstar Shabong ka dawa na ka tnad PWD khumjuh ruh na ka Sorkar ba ka dei ban phah shna noh mardor ïa ka tei ka kynroh bad lada kam shna ka dei ban shim ïa ka jingkit khlieh lada don kano kano ka jingjia ba sngewsih kum kaba ïa tyngkhuh kali ne ka jing ïa mynsaw ha ka tei ka jaka.

Ka HYC ka kyntu ruh ia ka sorkar ne ïa ka PWD ba lada don kiei kiei ki daw kiba pynlong ïa ka ba kan ym lah ban trei kham kloi. Ka dei ban wad ki lad ki lynti ban pynkloi noh katba lah khnang ban ïohlad ban shna noh khnang ba kan ym buh ha ka jingma ïa ki paidbah kiba leit ba wan lyngba na ka tei ka surok bah.