Dawa ka JAC ban pynsangeh mardor iaka jingshna surok ka Assam ha Tahpat Lapangap

Syllad | The Rising MeghalayaOctober 7, 2020

Ka Lapangap Khanduli Border Area Joint Action Committee (LKBAJAC) kala dawa na u Deputy Commissioner, West Jaintia Hills District Garod LSN Dykes ban pynsangeh mardor iaka jingtrei surok ka Assam na Tahpat, Langkeroi, Lapangap, kaba hap ha khappud Assam Meghalaya haka sngi Balang

Ka Lapangap Khanduli Border Area Joint Action Committee hapoh ka jingialam u Chairman Pyrkhat Pyrphet, u Secretary ma Balajied Kshiar bad kiwei kiwei ki dkhot ka committee kila leit kynduh markhmat bad u DC Jowai bad ai ha u ka dorkhat ban pynkynmaw iaka jingdawa ka jong ki ban pynsangeh iaka jingtrei surok ka Assam na Tahpat, Langkeroi, Lapangap kaba kila ai naduh u snem 2019.

Kane ka surok kadei ruh kaba thmu ruh ka sorkar Assam ban pyniasoh iaka Khanduli.

U DC ula ong ba ia kane ka surok la dep wan jurip bad la pynsangeh ruh ha u snem 2019 bad na kaliang ka Assam kala pyntip pat sha ka bor district bad kane ka dei ka surok kaba rim. “Nakaliang ka bor district lyngba ka border magistrate la bthah ia ki trai jaka ban wanrah iaki kot ki sla ban pynshisha ba shah ktah ki jaka rep jong ki khnang ban lah ban iakren bad ka Assam, hynrei ym don satia na ki trai jaka ba wan mih sha ka border magistrate,” la ong u DC West Jaintia Hills, Garod LSN Dykes.

U Chairman JAC, Pyrkhatbha Pyrphet ula ong ba ngi la dawa na u DC ban shimkhia ban tuklar ban pyndam iaka jingshna surok ka Assam ban pyniasoh iaka Tahpat, Lapangap namar ba kane ka dei tang ka buit sianti ka Assam ban ioh kyntur pur bad bun ki jaka jong ki nongshong shnong ha khappud kila shah ktah namar kane ka surok.

“Bun tylli ki surok ba pyntrei da ka sorkar Jylla, kata kiba pynsiadoh iaka Khanduli-Mokoiram bad Saitsama to Rtiang kiba la pyntrei da ka skim PMGSY ki shah pynsangeh haka Assam, balei ka bor district jong ka West Jaintia bad ka sorkar kim lah ban pynsangeh iaka Assam,” la ong u Pyrkhat bad bynrap ba u DC u dei ban pynsangeh mardor iaka jingpyntrei iaka surok khnang ban don ka jingshong suk shongsain ha khappud.

“Ngi pyrshah jur iaka jingshna surok ka Assam, namar haba ki nongshong shnong ka Lapangap ki thmu ban maramot iaka surok ka sorkar Assam ka wan pynsngeh bad na kata ka daw ngi dawa na u DC ban pynsangeh mardor namar kane kadei tang ka buit jong ka Assam ban ioh kam hok kynti iaki jaka jong ki nongshong shnong ha khappud,” ong u Pyrkhat.

“Ka Sorkar Assam kam burom iaka Status Quo, katba ka sorkar jong ngi ka burom, kum ta ban lait na kino kino ka donkam iaka bor district bad ka sorkar ban pynsangeh iaka jingtrei ka Assam ha khappud Lapangap Khanduli,” ong u Pyrkhat.