Dawa ka JAC ban shimkhia mardor ia ka jingsniew ka surok NH-6 bad ka jingkit palat pud

Syllad | The Rising MeghalayaJune 16, 2024

Ka Joint Action Committee (JAC) kaba kynthup ia ka East Jaintia Hills Truck Owners & Transporters Association bad ka East Jaintia Hills Limestone Suppliers Association ha ka 14 tarik Jylliew ha ryngkat ka dorkhas ki la leit iakynduh ia u Deputy Commissioner ka East Jaintia Hills District ban dawa shimkhia mardor halor ka jingsniew jong ka surok bah NH-6 bad halor ka jingkit palat pud  jong ki trok kit mar kaba la pynlong ia kane ka surok ba kan sniew bad jot rathai ha baroh shilynter lynti khamtam eh ha ki thaiñ Elaka Narpuh.

Ki la pynpaw ruh ba ka jingsniew palat pud jong kane ka surok ka la wanrah ia ka jingeh bad ka jingma kaba khraw ia ki paidbah nongleit nongwan khamtam haba jia ka pang ka shitom.

Ha kane ka jingiakynduh ia u DC, ka JAC ka la pynpaw ruh ba kumba ka long mynta lah shitaiew tam ka jingsniew jong ka surok NH-6, khamtam ha ki thaiñ Narpuh ka la long kaba i sangsot shisha haduh katta katta kat haduh ba ka la don ka jingdheng kali kaba shyrkhei kaba la neh da ki phew phew kynta khamtam ha ki thaiñ Ratachera bad Tongseng.

Ka JAC ha u kyrwoh lyngba u Bah Loveyou Bareh President bad Deolangki Dkhar Secretary ka la ong ba ka daw baroh jong kane ka jingsniew jong ka surok ka dei na ka jingioh laitlan jong ki trok ban kit palat pud lyngba kane ka surok bah bad kaba la buh ruh ha ka jingma kaba khraw ia ka jingkieng Narpuh Sunapur bad ka Ripnar Samasi.

Kum ban shu kdew na ka liang ka JAC jong kitei ki ar seng ha ka 22 tarik u bnai Jymmang ba la dep ki la pynlong da ka jingkhynra naphang ia ki trok ki ba kit palat pud ha Kongong, Wapungshnong bad ruh ha Tongseng ha ryngkat ka jingiadonlang jong ki bor sorkar, kata naduh ki Magistrate, pulit, ki ophisar sorkar bad kiwei kiwei. Ha kane ka jingkhynra, ka JAC ka la bat bad pynphai noh ia shibun bah ki trok kiba kit palat pud.

Nalor kata ha katei ka jingiakynduh ia u khliehduh ka district ka JAC na ka bynta ka bha ka miat bad ka bit ka biang jong ki paidbah kiba pyndonkam ia katei ka surok bah NH-6, khamtam ki nongshong shnong ka East Jaintia Hills, ka la dawa jur na ka sorkar bad ki bor district ba ki dei ban pyntreikam hok ia ki kyndon jong ka Motor Vehicle Act, 1988 bad ka Prevention of Damages to Public Properties Act, 1984, ha ryngkat ka jingmaham ba lada ka sorkar kam lah ban tehlakam ia kane ka jingkit palat pud jong ki trok, ka JAC kan sa shim da kawei pat ka rai kaba tyngeh.

Ha kaba iadei bad kane ka jingdawa ka JAC ka la ai jingthoh ruh sha u Superintendent of Police, EJHD, District Transport Officer, EJH bad u Executive Engineer, PWD (Rds) NEC Division, Khliehriat.