Dawa ka JNC ban sorjamin iaki jaka ba iakynad hapdeng ka Meghalaya-Assam katkum ka history ki jaka

Syllad | The Rising MeghalayaSeptember 7, 2023

Ka Jaintia National Council (JNC) ka la leit ban iakynduh ia u Symbud Myntri Rangbah ka jylla u Sniawbhalang Dhar bad aiti ruh da ka jingthoh ban kyntu ban wad da ki riewshemphang ban sorbe na ka bynta ban pynlong ka jingwad bniah ha kaba iadei bad ka history jong ki jaka kiba don hapdeng ka jingiakynad hapdeng ka Meghalaya bad ka Assam khnang ban lap ia ki jingshisha.

Ka JNC ka la ong ba ka Meghalaya ka la mih noh na ka Assam kum ka jylla ba laitluid ha u snem 1972, bad ka jingthaw ia ka jylla la pynshong nongrim katkum ka Assam Reorganization (Meghalaya) Act of 1969. Hynrei, ka sorkar Meghalaya ka la kyntait ban pdiang ia kane ka Act namar kiba bun ki jaka kiba haduh mynta kiba hap hapoh Jaintia Hills, Ri-Bhoi bad West Khasi Hills la pynkynriah sha ka KarbiAnglong, Kamrup (metro) bad Kamrup district ka Assam.

Na ka liang ka Meghalaya ka la ieng pyrshah halor kane ka jingshah kynthup hadien ka jingioh laitluid, kata da kaba kam ba kine ki jaka ki dei kiba la shong shnong da ki trai shnong jong ka. Na ka liang ka Assam bad ka sorkar Meghalaya kim shym la lah ban pynshisha lyngba ki kot ki sla lane lyngba ki tiar ki tar ban pynshisha halor ka jingkam ia kine ki jaka bad hadien ki jingiakam markylliang la lah ban pynduna ia ki jaka kiba don hapdeng ka jingiakynad sha ki 12 tylli ki jaka ne sector, kata halor ka nongrim ba la kam da ka sorkar Meghalaya ha u snem 2011.

Ka JNC ka la ong ba mynta ia ka mat kaba iadei bad ki kam iakajia pud la khlieh da ka Regional Committee jong  baroh ki ar jylla bad ka jingiapynbeit ka dang iaid shakhmat. Hynrei ka Council ka kwah ban pyntip ba ka Regional Committee na baroh ki ar tylli kim don satia ia ki riew shemphang ne expert na ki tnat bapher bapher ban khmih halor ka histori jong baroh ki ar jylla, bad ruh ba ki Regional Committee ki la kyntait ban ia pynbeit ia ki jaka ba iakynad da kaba phaidien sha ka histori kaba iadei bad ki trai shnong kiba shong ba sah ha kito ki jaka kiba don hapdeng ka jingiakynad.

Na ka liang ka JNC ka kwah ruh ban phaikhmat khamtam ha kaba iadei bad ki jaka hapoh Jaintia Hills ha kaba katto katne na ki Elaka jong ka bad ki shnong ki dei kiba hap hapoh ka jingkhmih jong ka sorkar Assam, kata kum ka Nongphyllut Elaka ba la khlieh da ki Daloi naduh ki por ki bym lah ban kynmaw.Ka Council ka pynpaw ruh ba ki don ruh ki shnong ki thaw ba la shong shnong da ki jaidbynriew Pnar kiba hap hapoh u pud u sam jong ka jylla Assam.

Kumta ruh na ka bynta ka b ha ka miat jong ka imlang sahlang bad ki nongshong shnong na ka liang ka Council ka sngew donkam ba ka Regional Committee jong abroh ki ar jylla ki dei ban phaidien sha ka histori lyngba ka jingiarap jong ki riew shemphang na ki tnat bapher bapher ha kaba iadei bad kine ki jaka kiba don hapdeng ka jingiakajia.

Ha katei ka jingiakynduh na ka liang u Dy. CM u Sniawbhalang Dhar ula kular ban shimkhia ban leh ia ka ba donkam bad pynpaw ruh ba ha ka jingiadei bad ki kam khappud na ka liang ka sorkar ka la dep ban phah shithi sha ka sorkar Assam ban pynphai pat ne re-transfer ia kito ki shnong Pnar kiba don ha block 1 bad ruh ba kin dang ap ia ka jubab na ka Assam.