Dawa ka JNC ia ka sorkar ban pyndep noh kloi iaka Iawmusiang bad mini secretariat ha Jowai

Syllad | The Rising MeghalayaSeptember 7, 2023

Ka Seng Jaintia National Council (JNC) hynne ka sngi Balang ka la dawa na ka sorkar jylla ba kan pynkloi ha kaba iadei bad ka jingpyndep ia ka iew Iawmusiang kaba la ap khmih lynti la slem bad ruh ha kaba iadei bad ka Integrated Development Complex (Mini Secretariat) hapoh ka district headquarter ka West Jaintia Hills.

Ha ka memorandum ba la ai sha u Symbud Myntri Rangbah ka jylla uba peit ia ka Tnat Urban Affairs u Ma Sniawbhalang Dhar, ka JNC ka la ong; “Ngi da kyrpad jur ia ka sorkar ba kan shimkhia halor ki mat kiba iadei bad ka jingpyndep noh kloi iaka jingtei iaka Iawmusiang bad ia ka Mini Secretariat ha Jowai bad ruh na ka bynta ka jingtreikam jong baroh ki artylli ki residential school bad ka Teachers Training Centre ha East Jaintia Hills District.”

Ka JNC ka la ong ruh ba ka jingtreikam jong ka Teachers Training Centre hapoh  East Jaintia Hills District ka dei kaba kongsan bha khamtam hadien ka jingpyntreikam ia ka  Education Policy (NEP) 2020 kaba thymmai.

Ka la ong ruh ba ka jingtyrwa ban shna pynbha iaka Iawmusiang la bhah  T.20.09 klur da ka Ministry of Development of North Eastern Region (DONER), ha kaba la dep ban pyllait T.6.33 Klur na ka bynta kaba nyngkong.

Shuh shuh ka JNC ka la ong ruh ba ka jingtei ia kane ka iew la pynsangeh noh bad haduh mynta bad kane ka la sahteng la palat  shiphew snem kaba la ktah jur ia ka kamai kajih jong ki nongshong shnong kiba shaniah tylli ha katei ka ïew. Halor kane ka bynta ka JNC ka kyntu jur ia une u Myntri ba un shimkhia lem na ka bynta ban bhah ia ka mang tyngka na ka sorkar jylla ban pynsted ha kaba iadei ba ka jingtei ia ka Iawmusiang.

Nalor kata ka JNC kala pynkynmaw ruh ba ka sorkar jylla kala tyrwa ban tei iaka Mini Secretariat (Integrated Development Complex) ha man la ki district da ka jingthmu ban pynjan iaka jingai jingshakri ka sorkar ia ki paidbah. Kala pynpaw ruh ba hadien ba la dep ban pynkynriah ia ka ophis PWD, Jowai North Division sha Shangpung, u Myntri Rangbah ka jylla u Conrad Sangma ula buh ia u mawnongrim ha ka 3 tarik u Nohprah 2022 ban tei iaka Mini Secretariat ha Jowai. Ka sorkar jylla kala dep ban bhah iaka pisa T.19.83 Klur ban tei ia katei namar ba ka jingdon jong ka DC ophis markhap jong ka ïew bad hapdeng jong ka nongbah bad kan pynthud ia ka leit ka wan jongki paidbah bad kam don ruh ia ka jaka pynieng kali kaba biang.

Kumta ruh na ka liang jong ka JNC ka don ia ka jingsngew ba da ka jingtei kloi ia ka Mini Secretariat ha Jowai kan pynsuk ia ka jingeh kaba mad da ki paidbah bad da ka jingdep ban tei iaka Mini Secretariat, kan ai jingmyntoi iaki paidbah jong ka district namar ba kin ioh iaka jingshakri na baroh ki tnad sorkar kiba don lang hapoh jong kawei ka jaka ne ka tnum iing.

Shuh shuh ka Seng ka la kyntu ruh ia une u Myntri ban pynsdang noh ia ka jingtei ne ban pynsdang treikam shipor ia ka Mini Secretariat ha ka ophis treikam kaba la don lypa jong ka Tnat PWD Jowai North Division.