Dawa ka JNC ia u Myntri Sorkar na rilum Jaintia ban sangeh pynshlur wanrah lynti rel

Syllad | The Rising MeghalayaOctober 23, 2023

Ka Jaintia National Council (JNC) haka Sngi U Blei, kala dawa na u Myntri Sorkar, uba dei ruh u nongthaw ain na Rilum Jaintia ban sangeh ban pynshlur ban wanrah iaka lynti rel ha rilum Jaintia bad ban iakren ia kiwei pat ki ishu ha kaba iadei bad ka jingsahdien ka thain hapoh ka kynhun myntri ha ka jaka ban pynshlur wanrah iaka lynti rel.

“Ngi kyntu ia u Myntri jong ka Sorkar Jylla kiba napoh Jaintia Hills ban kren lem hapoh ka Cabinet jong ki ha kaba iadei bad ka jingsahdien jong ka East Jaintia Hills ha kaba iadei bad ki lynti Surok, ki Hospital Sorkar, ka Government College bad kiwei kiwei de bad kim dei ban kren tang na ka bynta ban wanrah lynti rel hapoh East Jaintia Hills, namar ia mynta hi ka District jong ngi kam pat donkam ia kata ka lynti rel,” la ong u kyrwoh bala phah u president JNC CEC, u Sambormi Lyngdoh.

Kane kala wan jia long hadien ka jingkren u nongthaw ain na rilum Jaintia bad u Myntri Sorkar Ma Comingone Ymbon uba la rai ba u pdiang sngewbha iaka jingwan ka lynti rel ha Rilum Jaintia ban myntoi u paidbah.

Ka JNC kala kren shai bad kwah ban pyntip sha ka MDA bad khamtam sha ki 7 ngut ki MLA napoh Jaintia Hills ba ka seng hi ka ieng halor ka nongrim kaba skhem ban pyrshah ia ka jingthmu ka Sorkar Jylla ban wanrah ia ka lynti rel hapoh East Jaintia Hills District.

Ki daw baka JNC ka pyrshah ka long ba wat ka JHADC kam pat lah ban shna ia ki aiñ kiba khlain ban iada ia ka khaïi ka pateng jong ki trai ri trai muluk bad ki Dorbar Shnong kim don kata ka jingpynkup bor lyngba ka Sorkar Jylla lane ki ADC ban pyrkhing bad tehlakam ia ka jingwanrung jong ki mynder ri.

Une u nongialam ka JNC ula ong ruh ba ka  jingwan ka lynti rel kan sa ktah ruh ia ki shnong ki thaw, ki khlaw ki btap, ki lum ki wah, ki jaka rep jaka riang bad kumjuh ruh kan sa pynjakhlia ia ki shnong ki thaw.

Kumba ka long mynta ka JNC ka la ong ba ka EJHD ka dei kawei na ki District ka bun bha ki karkhana bad ka jingwan jong ka lynti iaid rel kan pynmyntoi tang ia kine ki karkhana kiba don hapoh ka District bad kan pynsuk ia ki ban shalan ia ki jingpynmih mar ki jong ki sha kiwei pat ki jylla bad kan sa ktah pat ia ki kali kit mar jong ki trai ri trai muluk.

Kaba kham don jingma shuh shuh kalong ba ynda la wan poi ki rel, kata la kadei ka rel kit mar ruh hynrei la  tipshai ba kan sa pynsuk ia ki briew kiba na barjylla ban wan buhai shnong shapoh kane ka District ka jong ngi bad kane ka jingwan buhai shnong jong ki briew kiba nabar kan sa ktah ruh ia ka ioh ka kot jong ki trai Ri trai Muluk bad kan sa wanrah ruh ia ka jingshongkha khleh kaba shyrkhei sha ki thain nongkyndong bad ngi lah ruh ban kylla long ki rit paid ha la ka jong ka ri namar ba haduh mynta ruh ngim pat don ki ain kiba khlainbor kum ka ILP ban iada iangi na ka jingwan tyllep jong ki briew kiba na barjylla, ong ka Seng.

Kumta ka JNC kala maham ba kalong kaba la khreh ban iaid noh da kiwei pat ki lynti lada ka sorkar kam sangeh noh mardor ia kane jingthmu ban wanrah lynti rel  hapoh East Jaintia Hills