Dawa ka JSM ban pyntreikam noh ïaka RSETI

Syllad | The Rising MeghalayaJuly 17, 2020

Ki nongrep bad ki samla ha Jaintia kila duh ïaka kabu jong ka Rural Self Employment Training Institutes (RSETI) kaba ki dei ban ïoh na ka daw jong ka jingleh bymsuidniew jong ka United Bank of India, Jowai. Ki RSETI ki dei ki jaka ai jinghikai kiba dei ban seng ha kawei pa kawei ka distrik jong ka ri bad kine ki la ïarap shikatdei eh ïa briew ha kita ki jaka. Kaba sngewsih pat ka long ba ki nongrep bad ki samla haki distrik ha Jaintia ki duh noh ïa kane ka kabu.

Ïa kine ki jaka ar training dei ban shna bad pyntreikam da ki Bank bala jied na ka bynta kata ka distrik. Ka sorkar kmie kan ai ka jingïarap ïaka bank ka pisa kaba shisien ïarap kaba lah ban kot haduh shi klur tyngka. Kane ka pisa ka dei na ka bynta ban shna ki ïng kiba kynthup ïa ki kamra ai jinghikai, ki kamra trei, ki jaka sah bad kiwei pat ki jingdonkam. Ka jingïarap ka kynthup ruh na ka bynta ban pynïaid ïaka kam bad kine ki RSETI kin hap ban ai jinghikai 30-40 tylli ki jait training ha ka shisnem.

Ka jingthmu ba kongsan jong kine ki training ka dei naka bynta ki samla nongkyndong bym pat ïohkam bad kaba ym hap siew pisa lait noh tang ka bai kali. Ka por jong ki training ki ïapher kawei na kawei pat. Ki don kiba tang shitaïew bad ki don pat ruh kiba haduh hynriew taïew. Ki jait training ki lah ban dei ha ki kamrep kam riang, ka jingpynmih ïaki mar ki mata, ka jingshna pynbha ïa kaba la sniew, ka kam khapsñiuh bad pynbhabriew, ka kam shonkot da ki korputar bad ki kam ba kyrpang naka bynta ki kynthei. Lah ruh ban ai jinghikai kiwei pat ki kam kum kaba shna ïng, ki kam ban trei haki hotel ne ki aspata bad kiwei pat katkum ka jingdawa jong ka jaka.

Kawei pat ka jingïarap jong kane ka training ka dei ka jingkyrshan pisa daka ram ïa kiba la dep shah hikai ba kin seng la ki jong ki kam lajong. Hadien bala dep ïa ki training ki samla kin ïoh ruh ïaka syrnod bad kane kan ïarap ruh ban ïoh ïaka ram naki bank.

Kawei ka RSETI ka don ha Umran ha Ribhoi distrik ïa kaba la pynïaid da ka State Bank jong India bad kane kajuh ka bank kala sdang sa kawei haka West Garo hills. Kawei pat ka RSETI ka don ha Mylliem East Khasi hills ïa kaba la pynïaid da ka Punjab National Bank, hynrei kiwei pat ki distrik kim pat don RSETI.

Ha West Jaintia Hills ïa ka kam ban sdang ïa ka RSETI ha kane ka distrik la bynshet haka United Bank jong ka India, Jowai, hynrei haduh mynta ka bank kam pat leh eiei halor kane.

Ka seng Jaintia Students’s Movement (Western Region) haka shithi sha ka u Branch Manager jong ka UBI, Jowai, kala dawa na kane ka bank ban pyntreikam noh ia kane ka institute naka bynta ka jingmyntoi ki samla nongkyndong jong ka distrik.