Dawa ka JSU bad HANM ban thung kam bun ha ki tnad treikam ka sorkar pdeng .

Syllad | The Rising MeghalayaSeptember 2, 2019

JOWAI: Ka Jaiñtia Students’ Union (JSU) bad ka Hynniewtrep Achik National Movement (HANM) hapoh ka jingialam u Treiborlang R Suchen bad u Bah Lampharang Kharbani haka jingdonlang u President JSU Central Body Lawyerson War bad u General Secretaty JSU Jersom Shylla bad kiwei kiwei de ki dkhot haka 28 tarik une u bnai kila iakynduh ia u Myntri khynnah jong ka Sorkar India u Ramdas Athawale u ba bat ia ka tnat Social Justice and Empowerment jong ka Sorkar India.

Kine ki ar seng ki la ia kynduh ia une u myntri mar khmat ha Pine Wood Hotel Shillong bad la ai ruh sha u da ka dorkhat ha kaba ia dei ban pynthymmai ia ka Reservation policy ne quota ha kaba ia dei ban bhah kham bun ia ka hok thung kam thung jam bad ki khynnah pule kiba dei ki trai ri trai muluk jong ka jylla Meghalaya kiba kynthup ia ki Khasi, Jaintia bad u Garo ha ki ophis, hospital bad jaka pule kiba hap bad pyniaid da ka Sorkar pdeng ne Governtment of India khamtam ban bhah kham bun ki post nurse bad Doctor ha hospital NEIGRIHMS bad NEIAH, kumjuh haka skul bah NEHU khamatam ia ka post Lecturer bad Professor bad ki kam ophis, National Institute of Technology (NIT) kaban sa plie thymmai ha Sohra, ka jaka pule suh jain phong bad tiar phong ka NIFT kaban sa plie shen ha New Shillong ne Mawdiangdiang bad khamtam ruh nabynta ka bhah thung kam hapoh ka Meghalaya Rural Bank (MRB) ban thung noh kham bun ki ST ne trai ri trai muluk kiba kynthup ia ki Khasi,Jaintia bad Garo na bynta ka post scale -1 officer bad kiwei kiwei ki post ba kham heh.

Kine ki arseng hadien ba ki la ioh ban ai ia ka dorkhat ha u myntri khynnah ka sorkar pdeng ha Pine Wood ki la ioh ban ia kren bad iatai bad u kham bun por ha ing sah sorkar ha Tara Ghar hadien ba u lah wan phai na ka jingialang bad u Myntri Rangbah ka jylla ha secretariat.

U Treiborlang Suchen u lah ong ba ki arseng kin buddien ia kane ka issue bad u lah kyntu lem ia ka sorkar jylla ba ka dei ban shim khia ban bud dien bad ban ia kren bad ka sorkar pdeng ban bhah kham bun ka Reservation quota na bynta ki ST ha ki ophis bad hospital bad jaka pule ba pyniaid da ka sorkar pdeng namar ka jylla Meghalaya ka dei ka jylla kaba don kham bun ki Schedule Tribe kiba don ym duna ia ka 85 % ka jingbun paid bad kumba 25.5 lak na ka 36 lak ka jingbun paid hapoh ka jylla Meghalaya kat kum census ne Economical and Statistical Data -2017 jong ka sorkar jylla.

U Treiborlang ula ong ba kine ki ophis, skulbah ne hospital kiba pyniaid da ka sorkar pdeng ki dei ban thung nongtrei da ki trai ri bad lada kim thung kam myntoi eiei ba ki trai ri kin die jaka sha ki na bynta ban tei ki jaka pule bad hospital ki ba heh. Bad ula ong bunsien la lap ba kine ki ophis, ki skul bah bad hospital kiba pyniaid ka sorkar pdeng ki wanrah ia ka wan tuid kiba nabar bad ka jingbuhai shnong ki nongwei nongar sha kane ka jylla abd kumta ula kyntu iaka sorkar ban shimkhia ba iakren halor ka bhah kam ki trai shnong ha kino ki ophis, skul bah, hospital ba pyniaid da ka sorkar pdeng.

U President seng kmie jong ka HANM u la ban jur ba dei ban dawa ia la ka hok long trai bad u lah ong ka sorkar jylla ka dei ban ia leh ban pynioh ia kane ka jingdawa ban bhah kham bun ia ki trai ri trai muluk bad ban pynthymmai ia ka Reservation policy hapoh ka jylla ha kaba iadei bad ki ophi, hospital bad ki jaka pule jong ka sorkar pdeng bad u lah bynrap shuh shuh da kaba ong wat ki company shimet kiba seng kam hapoh ka jylla ruh kidei ban ai lad ban rung kam da ki samla Khasi Jaintia bad u Garo.