Dawa ka JSU ban buh da ki CCTV bad pynjur pahara ha khappud ba jur ka kam runar ki suba Bangladesh

Syllad | The Rising MeghalayaApril 8, 2019

JOWAI: Ka JSU War Jaiñtia hadien ka jingjia shah thombor bad shah lute ki trok ha Dawki kala dawa ban buh da ka CCTV bad ban pynjur ka jingpahara ïaki lynti synkieng bad khappud na ki Pulit ka Jylla bad ki shipai BSF ha Dawki.

Ka JSU haka jingïalam u President Eddy Kery Pohtam bad u General Secretary Kerrydiam Lamin ban wanrah ïaka jingshong shngain ki paidbah bad ki nongleit nongwan kumjuh ki nongniah trok ba kit mar sha Bangladesh kila ïakynduh u Commandant BSF,  Dawki BOP U P Kumar ban kyrpad ïa u ban pynkhlain ka jingpahara ha khappud  khamtam haki jaka bym shngain bad ban khanglad ïaki riew sniew ban leh ki kam bymman.

Ka JSU kala kam ba na kaliang u Commandant ka BSF ula kular ban shimkhia ban peit ïaka khappud ban lait na kino kino ki jingjia ba sngewsih bad ula kyntu ïaki paidbah bad ki shipai shnong ban iatreilang bad ban ai jingtip haba don kano kano ka jingsuba sniew iaka jingiaid jingieng ki briew ha khappud bad pyntip mar mar sha ki shipai.

Ha ka juh ka por ka JSU War Jaiñtia ka lah leit ban ïakynduh ruh ïa u Officer Incharge Dawki Police Station ban kyrpad ïa u ban shimkhia ban peit ïaka shongsuk shongsain bad tem ïaki kam sniew kam runar ha katei ka thain. Ka JSU kala jingmut ban ruh ïa ka tnad pulit ban buh CCTV ha ki jaka bapher bapher ban tem ïaki kam runar ruser.

Ka JSU kala kyntu ruh ïaki Dorbar Shnong ha thain War Jaiñtia ban pynkhlain ïaki shipai shnong bad ban iatreilang bad ki BSF lane ki Pulit khnang ban tem ïaki kam runar haka thain khappud baroh kawei.