Dawa ka JSU ban pynkloi ban aiti ia ka jingtohkit sha ka CBI halor ka jingjia shah siat iap ha Mukroh

Syllad | The Rising MeghalayaNovember 23, 2023

Ka Jaintia Students’ Union (JSU) haka sngi Balang ka la dawa na ka sorkar jylla ba ka dei ban pynkloi ha kaba iadei bad ki sienjam khnang ban lah ban aiti noh ia ka jingtohkit halor ka jingjia shah siat iap jong ki riew paidbah ha Mukroh sha ka tnat Central Bureau of Investigation (CBI).

Lyngba u kyrwoh ka JSU ka kyntu ia ki nongshong shnong ka jylla Meghalaya ba kim dei ban klet ia kane ka jingjia ba sngewsih ha kaba san ngut ki riew paidbah ki la shu duh ei na ka jingshah ther kuli pathar ha ki bor pulit ka Assam bad ki forest guard ha Mukroh kaba la jia ha ka 22 tarik u Naiwieng 2022.

Da kaba pynpaw ia ka mynsiem jong ka jingiatylli lang kawei bad kiba haiing hasem jong ki lanot, na ka liang ka JSU ka la pynpaw ruh ba kan iai bteng ban dawa na ka bynta ban pynioh ia ka jingbishar hok na ka bynta jong ki.

Shuh shuh ka JSU kala dawa ruh na u Myntri Rangbah ka jylla u Conrad K Sangma ba u dei ban buh da ka Border Police Out Post ha Mukroh khnang ba kin lah ban ai ka jingshngain ia ki nongshong shnong, hynrei haduh mynta kane ka BOP kam shym la long kaba biang pura.