Dawa ka JSU ia ka JHADC ban ym ai NOC na ka bynta ka project lynti rel ha Rilum Jaintia

Syllad | The Rising MeghalayaApril 16, 2025

Ka Jaintia Students’ Union (JSU) ha ka 16 tarik Iaiong ka la kyntu ia ka Jaintia Hills Autonomous District Council (JHADC) ba kam dei satia ban ai kano kano ka No-Objection Certificate (NOC) na ka bynta ka jingpyntreikam ia ka project lynti rel namar ka jingbym don ia ki lad jingiada kiba biang na ka jingwan rung kyrthep ki briew kiba na bar kum ka Inner Line Permit (ILP).

Ha ka dorkhas ba la phah sha u CEM ka JHADC u Bah Thombor Shiwat, ka JSU ka la pynpaw ka jingpyrshah kaba jur halor kano kano ka jingthmu ban ai NOC sha ka Northeast Frontier Railway (NFR) na ka bynta ka jingshna ia ki lynti rel, steshon rel ne kino kino ki jingtei kiba iadei bad ka project lynti rel hapoh Rilum Jaintia.

“Ngi kyntu ia ka JHADC ba kam dei ban ai ia kano kano ka jingbit ne jingmynjur ia kiba kum kine ki project tad haduh ba ka sorkar Meghalaya kan ioh ia ka jingbit na ka Sorkar India ban pyntreikam ia ka Inner Line Permit (ILP) ha ka jylla,” ka la ong da kaba bynrap, “Ka jingai NOC khlem ka ILP ka lah ban lam sha u pud ban ym lah ban tehlakam ia ka jingwan rung kyrthep ki briew kiba na bar bad ka ban buh jingma ia ka jinglong jingman, ia ka kolshor bad ia ka tynrai jong ki paid Jaintia bad ki trai muluk ka Jylla Meghalaya hi baroh kawei.”

Nalor kata, ka JSU ka dawa ruh na ka JHADC ba kan pynsangeh noh mardor ia ka jingai Trading License lane kino kino ki jingbit kiba iadei ha ka liang ka ioh kam ioh jam sha ki briew kiba na bar jylla, khamtam eh ha kaba iadei bad ki kam ki jam ia kiba ki trai muluk ki lah ban trei hapoh ka district.

“Ngi ngeit skhem ba ki lad ioh kam ioh jam bad ki kam khaii pateng hapoh ka district dei ban ailad shwa sha ki nongshong shnong kiba dei ki trai muluk.”

Ka JSU ka la ban jur ruh halor ka jingdonkam mardor ban tehlakam bad ban pynlong ka jingjurip bniah ia baroh ki license jong ki dukan, ban pynlong ia ki jingkhynra bad ban pyndam noh ia ki license ia kiba la suba leh thok. Ka la ong ruh ba ka JHADC ka dei ban bthah halor ka jingdonkam ban wah ia ki kyrteng jong baroh ki nongtrei bar jylla kiba trei ha kawei pa kawei ka dukan ne kino kino ki kam khaii pateng. Kino kino kiba ialeh pyrshah ia kane ka jingbthah dei ban pynlong da ka jingkhmih bniah bad ban kyndang ia kiba kum kine ki briew na ka jylla lada kim lah ban pyni ia ka thup ne ban ai ia ki jingpynshisha.

Kumjuh ka JSU ka la dawa ruh na ka JHADC ba ka dei ban khmih bniah bad ban shim ia ki lad jingpynshitom pyrshah ia ki riew shimet kiba leh Benami hapoh ki kyndon jong ka Benami Transactions (Prohibition) Act, 1998.

“Kano kano ka jingpulom na ka liang ka JHADC ban shim ia ki sienjam kiba tyngeh ia ki riew shimet kiba donkti ha ki kam Benami na ka liang ka JSU kam banse ban shimkhia da lade ban rah ia kane ka mat sha ka iingkashari khnang ban ioh ia ka jingbishar hok pyrshah ia kine ki kam beain,” maham ka JSU.