Dawa ka JSU War Jaiñtia na ka JHADC ban nym ai trading license ïaki bar jylla ba khaïi mawshun mawsalin

Syllad | The Rising MeghalayaMay 11, 2019

JOWAI: Ka Jaiñtia Students’ Union (JSU) War Jaiñtia Circle kala dawa na u EM Incharge Trading by Non Tribals, JHADC Ma Winning Garland Sungoh ban nym ai trading license ïaki bar jylla kiba khaïi bad trei bylla haka kam mawshun bad mawsalin bad kiwei ki jait kam ban nym ktah iaka jingkamai u trai ri trai jylla.

Ka JSU War Jaiñtia haka jingïalam President JSU War Jaiñtia Eddy Kery Pohtam, u General Secretary Kerrydiam Lamin haka sngi Thohdieng kila ai da dorkhat ban kyrpad ïa EM Incharge ba dei khmih ïa ka tnad Trading by Non-Tribal’s ban nym ai Trading License ïaki bar jylla kiba thmu ban khaii mawshun, mawsalin bad ïa kiwei kiwei ki jingbit ba kin ïoh ban trei bad bylla ha par mawshun bad par maw bad kiwei kiwei ki kam ba ki trai jylla ki dang lah ban trei ha War Jaiñtia.

Ka JSU kala ong ba nakaliang u EM ula kular ban shimkhia bad kyntu ïaki shnong ban nym ai NOC bad iatreilang bad konsil.

Ka JSU kala ong ba mynta kila jyllei bha ki kali bar jylla kiba kit mawshun mawsalin bad kala ktah iaka kamai ki kali trai jylla namar ba ka jingiohrung ki trok ba shalan mar ruh ka duna bha sha Bangladesh kaba kot tang 200-300 tylli shi sngi. Halor kane ka JSU ka dawa ban pyndam ai trading license bad kiwei kiwei ki jingbit ba ki bar jylla ba kin nym iohlad ban knieh iaka jakpoh ki trai jylla.

Ki nongialam ka JSU kila kyrpad ruh ïaki waheh shnong ka thain war ba kim dei ban ai jingbit ïaki bar jylla ban seng kano kano ka kam kiba lah ban trei da ki trai jylla.