Dawa ka JTTA na ka JHADC ban nym pyllait trading license iaki bar jylla ha Rilum Jaintia

Syllad | The Rising MeghalayaSeptember 27, 2021

Ka Jaintia Tribal Traders Association (JTTA) haka sngi Nyngkong hapoh ka jingialam u president Iatha Najiar kala leit ban ïakynduh ïa u EM incharge ka tnad Taxation, Jaintia Hills Autonomous District Council (JHADC) u Ma W Sungoh ban dawa na u ban nym ai Trading License sha ki nongkhaïi bar Jylla lane ki company bar jylla ha rilum Jaintia khamtam hapoh ka sor Jowai.

Haba ïadei bad ka jingai Trading License, u Ma W. Sungoh ula ïathuh ba ïa kane ka kam ym lah ban leh tang da ka konsil hynrei kaba kongsan hi kadei na ki dorbar shnong. Ula pynsngew ba ula ju khot ïaki nongïalam jong ka Synjuk ki Waheh Jowai ban ïaphylliew jingmut halor kane ka bynta.

Ula kular ban rah ïa kane ka phang haka Executive Committee jong ka JHADC bad ula ban jur ïaki Dorbar Shnong ban shim ka jingkit khlieh.

Ka JTTA ka pynpaw ba ka dap da ka jingsngew nguh kaba khraw ïa u Ma Sungoh uba la shimkhia haba jingïadei bad kane ka bynta.

Ka JTTA ka la kyntu ïaki sengbhalang bapher bapher ka rilum Jaintia, ka Synjuk ki Waheh Shnong kiba don ha sor bad nongkyndong ban pyrkhat ïa kane ka bynta khnang ba ki trai ri trai muluk kin nym kyrduh kam kyrduh jam bad ba ki lah ban ieng rasong haka kam khaii pateng.

Ka JTTA ka la ïathuh ba ka la dep ban ïaphylliew jingmut bad ka Ladthadlaboh Dorbar Shnong ban pynsngew ïaki jingeh jong ki nongkhaïi trai Jylla lada wan ki Company bar Jylla ban sengkam sengjam hapoh Jaintia ne ha sor Jowai. Ka JJTA ka kyrpad ia baroh ki dorbar shnong ban ai ka jingïatreilang ban khang lad iaki company ne ki bar jylla kiba wan ban seng kam ha rilum Jaintia.