Dawa ka JYF ban shna ïaka surok haka thain Sumer

Syllad | The Rising MeghalayaAugust 27, 2019

KHLIEHRIAT: Ka Jaintia Youth Federation (JYF) hadien ba la ioh jingujor bad ka jingud jingnam u paidbah halor ka jingsniew tasam ka surok ha ka thaiñ Sumer kaba pynïasoh ia bun tylli ki shnong kala ka la leit ban jurip bad kala lap ba kane ka surok kadei ka surok ktieh kaba dap da ki thliew ki syar suda ha baroh shilynter.

Ka JYF kala lap ba kane ka surok kala sniew naduh ka shnong Lad-Larket, Pala, Kseh, Khahnar bad kiwei kiwei kaba la ktah jur ïaka iaid ka ieng u paidbah. Kine ki shnong baroh ki dang hap hapoh ka Saipung Block bad hapoh ka 5 Sutnga-Saipung Constituency.

Ka jingsniew kane ka surok kala long shaba palat bad kaba la buh jingeh ia ki kali kiba iaid ba ieng namar ba ka long kaba khohruh khohram bad kaba dap da ka ktieh bad ki thliew ki syar. Ha ka por slap wat ki kali heh kim lait ban iaid na kane ka surok bad ki sahkut ha shiteng lynti bad thud ka leit ka wan u paidbah, khamtam haba pang ba shitom.

U B Chyrmang, Secretary JYF East Jaiñtia Hills District ula ong ba kane ka jingsniew kane ka surok ka buh ïaki jingim ki paidbah nongshong kali bad ki nongshong shnong katei ka thain ha ka jingma.

Halor kane ka jingsniew kane ka surok ka JYF ka kyntu ia ki bor ba dei ban peit jong ka tnad Public Work Department (PWD) bad kumjuh ruh ia ki nongmihkhmat jong kane ka thaiñ naduh u MDC bad u Local MLA ba kin shim khia bad ban phah shna noh ia kane ka surok ban suk ka leit ka wan u paidbah.