Dawa ka Jylla iaka jingtuklar ka Sorkar Pdeng halor ki jingeh pyntrei iaka MGNREGS

Syllad | The Rising MeghalayaMay 13, 2024

U Myntri ka sorkar Jylla uba khmih ia ka Tnat Community & Rural Development u AT Mondal ha ka 13 tarik mynta u bnai u la ong ba u la phah ia ka jingtuklar lem jong ka Tnat ka Sorkar pdeng halor ki jingeh kiba mih na ka jingpyntreikam ia ka skhim Mahatma Gandhi National Rural Employment Guarantee Scheme (MGNREGS).

Haba kren sha ki lad pathai khubor, u Mondal u la ong, “Nga la dep ban phah kawei ka shithi kaba pynpaw halor baroh kine ki jingeh. Ngi kyrmen skhem ba hadien ka ilekshon yn sa lah ban weng noh ia kine ki jingeh baroh.”

Da kaba pynpaw ba ki jingtreikam kiba iadei bad ka rukom siew ka dei kawei na kine ki jingeh kaba khraw, u la ong, “Kane ka la pynmih ia shibun ki jingeh na ka bynta jng ngi namar kiba bun kiba don ia ki jobcard kim shym la pyniasoh ia ki job card jong ki bad u Aadhaar. Mynta ka sorkar India ka la pynlong kum ka bynta kaba dei ban leh bad kaba kongsan ba baroh kiba don job card ki dei ban pyniasoh bad u Aadhaar.”

“Ngi kyrpad ia u Myntri Rangbah ba un thoh sha u Myntri ba dei khmih bad u la dep ban thoh da ka shithi bad dang shen Nga la thoh biang sha u. Kane kadei kawei na ki jingeh kaba ngi hap ban peit bniah bad ban leh ei ei tad haduh ba baroh kiba don job card kin pyniasoh bad u Aadhaar,” u la bynrap.

Halor ka mat kaba iadei bad ka pisa ban tiar bai tar, u Modal u la ong, “Ngi ju pyllait ia ka bhah jong ngi hapoh ka por ba la buh, hynrei ka shong kumno ba ia ka pisa la pyllait napoh Delhi. Mynta ka kynti ka ilekshon ka la iaid lah ar bnai, kumta ka long kaba shem shitom ban pynlong ia ka jingiakren bad ki heh hapoh Delhi.