Dawa ka KHNAM ban khang ia ki kali Tourist na bar jylla ban wan kamai sha ki jaka jngohkai

Syllad | The Rising MeghalayaSeptember 10, 2024

Ka Khun Hynniewtrep National Awakening Movement (KHNAM) ka la dawa na ka Khasi Hills Autonomous District Council (KHADC) ba ka dei ban pynmih da ka jingpynbna paidbah ban khang pyrshah ia baroh ki kali kamai Tourist kiba na bar Jylla ban wan kamai sha ki jaka jngohkai ha ka Jylla kiba hap hapoh u pud u sam jong ka Council.

Ha ka shithi sha u Executive Member ka KHADC uba khmih ia ka Trade u Bah Gigur Myrthong, u Working President ka KHNAM u Bah Thomas Passah u la kdew katkum ka United Khasi-Jaintia Hills District (Trading by Non-Tribal) Regulation 1954, bad ong ba ka para 3 ka kdew shai ba “Ym don da kiwei pat lait na ki trai shnong riewlum jong ka District kiba lah ban trei ia ki kam khaii pateng ne kiwei pat ki kam kamai kajih hapoh KHADC lait noh tang kito kiba la ioh laisen na ka KHADC.”

“Ka jingthmu ba kongsan jong kane ka ain ka long ban pynthikna ba ki kam khaii pateng lane ki kamai kajih jong ki trai shnong riewlum ki dei kiba ioh ia ka jingiada ha baroh ki por.Kumta, ngi dawa jur na ka Council ba kan pynmih da ka jingpynbna paidbah ban khang pyrshah ia baroh ki kali tourist kiba na shabar ka jylla ba kin wan kamai sha ki jaka jngohkai kiba don hapoh jong ka district namar lyngba kane ngin lah ban iada ia ka kamai kajih jong ki trai shnong kumba la kdew ha katei ka regulation, 1954,” u la ong.

Nalor kata une u nongialam ka KHNAM u la ong ruh ba la sakhi ia ki kali tourist taxi kiba na shabar ka jylla khamtam na Assam kiba la wan rung laitlan sha baroh ki jaka jngohkai kiba hap hapoh u pud u sam jong ka KHADC khlem ka Trading Licence mynta la bun bun snem.

Shuh shuh u la ong ruh, “Lada kine ki kali tourist na shabar jylla ki kut tang ha kaba kit ia ki nongleit nongwan na kawei ka jylla sha kawei pat lyngba ki jaka ba la buh, kata tang ha kaba leit buh bad leit shaw, lehse yn ym donkam ia ka Trading Licence. Hynrei, la iohi pyllein pyllein ba kine ki kali tourist ki la leit rung lut sha ki jaka jngohkai kiba pajih tam ha ka jylla Meghalaya kaba dei beit beit ka jingwan kamai kajih hapoh u pud u sam jong ka district.”