Dawa ka KHNAM ia ka bhah thungkam kaba 80% ia ki trai jylla ha ki kompeni

Syllad | The Rising MeghalayaNovember 27, 2023

Ka Khun Hynniewtrep National Awakening Movement (KHNAM) kala dawa ia ka bhah thungkam kaba 80% ia ki trai ri trai ri trai muluk ka jylla hapoh ki jaka treikam ba shimet kumjuh hapoh ki kompeni.

Ha ka shithi sha u Chief Secretary ka Jylla u Bah DP Wahlang, na ka liang u President ka KHNAM u Bah Pyndapbor Saibon u la ong ba na ka liang ka party kala aijingmut ruh ban pynrung ha ka jingtyrwa ban pynkylla ia ka State Reservation Policy.

“Ngi la dawa na ka bynta ka bhah thungkam kaba 80% ha kino kino ki kam ba lait ha ki jaka treikam ne ki ophis ki riewshimet ne kompeni, ba dei ban buh bha na ka bynta ki riewlum kiba dei ki trai trai jylla ka Meghalaya” ong u Bah Pyndap.

Nalor kata da kaba pynksan halor kane ka bynta, u President ka KHNAM ula ong ruh “Da kaba phaikhmat halor ka jingeh ha ka liang ka iohkam iohjam ha ka jylla, ngi sngewthuh shai ba tang ka sorkar marwei kan ym lah ban aikam lut, kumta, lada ki jaka treikam shimet kumjuh ki kompeni ki shah kdup lang hapoh ka thup jong ka SRP, kane kan iarap ha ka liang ka iohkam ioh jam hapdeng ki samla ka Jylla.”

“Nalor kata katkum ka Office Memorandum (OM) kaba 18 tarik Jylliew, 1973 para 7.2, kala dep kynthup lypa ia ki public undertaking, ki Institute ba iarap ka Sorkar bad ki contractor hapoh ka SRP. Kumta ruh ngim iohi ia kino kino ki jingeh na ka bynta ban kynthup lang ia ki jaka treikam ne ophis shimet bad ki kompeni hapoh ka SRP” ong u President ka KHNAM.

Ha kajuh ka por u la ong ruh ba na ka liang ka party ka la dep lypa ban phah ia ka jingai jingmut halor ka jingtywa ban pynkylla ia ka SRP,1972 bad kumjuh ia ki Office Memorandum lyngba ka shithi kaba 31 tarik Jymmang, 2023.

Shuh shuh u la ong; “Ngi sngewkhia jur halor ka jingpynslem ban shim ia ka rai kaba khatduh halor ki amendment bad kyrpad ia ka Sorkar ba kan kham pynsted ia kane ka kam khnang ban lah ban pynkloi halor ka jingshim rai.”